بسمة وهبة تشكو من تعرض صديقتها للإهمال الطبي: عملوا ليها عملية في ممر.. والدكاترة بياخدوا الفلوس من غير إيصالات
كشفت الإعلامية بسمة وهبة، تفاصيل تعرض صديقتها المصابة بالسرطان بالإهمال الطبي في أحد مستشفيات منطقة المهندسين، بعد إجرائها عددا من العمليات الجراحية لاستئصال بعض الأعضاء المصابة بالخلايا السرطانية في جسدها.
وقالت بسمة وهبة في لايف عبر حسابها بموقع إنستجرام: أعز أصحابي مصابة بالسرطان في أماكن كتير في جسمها وبعدين الكيماوي معملش معاها حاجة، وفيه دكتور قال إنه يقدر يشيل كل الأعضاء دي علشان يتخلص من الخلايا السرطانية ومشينا ورا الحلم وبصيص من الأمل وعملت هذه العمليات وشال لها كل الأعضاء زي القولون وحاجة على الكبد والرحم وحاجات كتير حوالي 5 حاجات وبعد ما عملت العمليات دي تدهورت حالتها أكتر.
وتابعت بسمة وهبة، أن الطبيب الذي أجرى العمليات الجراحية لصديقتها تهرب من التواصل معاها بشكل مباشر بعدما كانت حريصة على الاستفسار عن أدق التفاصيل في الحالة الصحية لصديقتها، قائلة: بصرف النظر أن الدكتور المساعدين بتوعه بيقول أنه عمل عملية عظيمة على عيني وعلى راسي، العملية تنفيذًا لابتكاره واختراعه ومهارته، لكن المريض نفسه اتبهدل البنت من يوم ما عملت العملية وهي عايشة في المستشفى، والمستشفيات اللي بتدخلها اللي فيها هذا الطبيب اللي بحترمه على كل الأحوال رغم أنه عمل معايا خناقة كده أنا فهماها عشان مبقاش بكلمه وأعرب حاجة وأوجع دماغه أني أسأل على صاحبتي وأختي، هو مصدر لينا المساعدين بتوعه.
وأكدت بسمة وهبة، أن المستشفى كانت تٌخضع صديقتها للعمليات الجراحية دون مواقفة أسرتها، قائلة: صاحبتي دخلت المستشفى أكتر من مرة ووالدتها كانت بتسيبها عشان تروح تنام تلاقيها الصبح لما ترجع أنهم دخلوها الصبح العمليات وعملوا ليها عملية، إزاي يقولوا إحنا مضيناها، يعني مضيتوا واحدة تعبانة؟ مش قادرة وفي وضع لا يسمح أنها تمضي أنها مسؤولة عن العملية أنها بموافقتها.
وأضافت بسمة وهبة، أنها في محاولة منها لإنقاذ صديقتها بعد تدهور حالتها الصحية، نقلتها إلى مستشفى سعاد كفافي الجامعي، ولكن كانت تعاني من مياه على الرئة وكان من المفترض معرفة نوع الأدوية التي تلقتها ومدة العلاج، وهو الأمر الذي رفضت إدارة المستشفى بالمهندسين التصريح به بسبب عدم تواجد ملف المريضة لدى التمريض وعدم تواجد موظف الأرشيف، قائلة: كلمت المستشفى اللي في المهندسين والمستشفى نايمة بيقفلوا بالليل، والممرضة اللي ردت عليا الساعة 5 الفجر قولتلها عايزة أعرف الدواء اللي بسأل عليه ده خدته كام جرعة ومن قد إيه، ردت عليا رد يفقع وقالتلي معنديش الملف وبينزل الأرشيف، طلبت أكلم المسؤول عن الأرشيف قالتلي أنه في بيته نايم والأرشيف مينفعش نفتحه، ولما قلت لها الست تعبانة حاولي تلحقيني قعدت تضحك ولغاية دلوقتي أنا بسأل هي بتضحك على إيه.
بسمة وهبة: الدكاترة في مستشفى في المهندسين بياخدوا فلوس من غير ورق
وواصلت بسمة وهبة أن الدكاترة المستشفى بمنطقة المهندسين يحصلون تكلفة العمليات من المرضى دون أوراق رسمية من المستشفى، قائلة: واحد في المستشفى اللي في المهندسين قولتله لو المريضة دي جاتلك دلوقتي مش هتطلع ليها الملف من الأرشيف؟، قالي لأ هعمل ليها ملف جديد، أسوأ رد سمعته في حياتي، ملف جديد إزاي مش دي المريضة بتاعتك بقالها 3 أسابيع وعمالين تشيلوا حاجات من جسمها وتنقلوا ليها في دم والدكاترة تاخد الفلوس من غير ورق وصولات وتحويلات والمساعدين ياخدوا الفلوس، والست والدتها كبيرة وساكتة، غير فلوس المستشفى، ليه كل ده عشان إيه؟.
وأضافت بسمة وهبة مستنكرة: أنتوا إزاي واخدين الترخيص؟ إزاي المستشفى قائمة؟، وإزاي الدكاترة عندكم بيتعاملوا مع المريض كده، وإزاي يكون عندها ماية على الرئة وتسيبوها تخرج بالشكل ده، دي منفوخة ومش عارفة تتنفس، وأنا علشان أجي أصلح مش عايزين تدوني بيانات ينفع كده؟، وإيه كمية الفلوس اللي بتسحبوها من المريض دي ليه بتستغلوا المواقف، لازم يبقى في تقنين للفلوس اللي بتدفع بين المريض وإدارة المستشفى، هو كل مستشفى ماشية على مزاجها؟، حرام فلوس مش مدفوعة في مكانها، هي كانت محتاجة كيس دم وهما جابوا اتنين، وهي ماشية قالوا هنخليلك الكيس بتاعك عندنا، في إيه؟ ومعينين ممرضات مش طايقين شغلهم، من الواضح أن دي مستشفى استثماري بتدور تطلع فلوس ومش مهم الفلوس.
واختتمت بسمة وهبة قائلة: نفسي الجهات المعنية تبص كويس على المستشفى دي، لأن كل أسعارها غالية جدًا وهي متستاهلش، دي قالتلي لما خدوها الفجر علشان يعملوا لها العملية عملوها في ممر مش في أوضة عمليات، هاتوا الفيديو بتاع أوضة العمليات مش كل حاجة موثقة؟ طلعوا البنت على ممر في آخره حمام، إيه اللي بتعملوه في المرضى ده؟، الواحد يعمل إيه معاكم؟.
