مي القاضي: أحمد السقا وشه حلو عليا.. والجمهور حصرني في دور البنت الرقيقة
تحدثت الفنانة مي القاضي، عن تكرار تعاونها مع الفنان أحمد السقا، في مسلسل العتاولة 2 الذي عرض في السباق الرمضاني الماضي 2025، حيث كانت بدايتها الفنية برفقته في مسلسله خطوط حمراء.
وقالت مي القاضي، في لقائها مع القاهرة 24: أحمد السقا دايمًا وشه حلو عليا، لأن أول مرة أشتغل كان في خطوط حمراء وحصل انتشار كبير وقتها.
أما عن سبب تقديمها شخصية راقصة خلال أحداث مسلسل العتاولة 2، فعلقت مي القاضي قائلة: الجمهور حصرني سنين في دور البنت الرقيقة، وأنا كنت محتاجة أطلع من حتة البنت الرقيقة مش هفضل طول عمري أعمل نفس الدور أنا نفسي زهقت مش الجمهور بس، والمخرجين مش شايفني من الأدوار الشعبي خالص ومش شايفني في أي حاجة برا الشخصية الرقيقة، فكان لازم أعمل تغيير.
مي القاضي: مش ندمانة على دوري في العتاولة
وكانت علقت مي القاضي، على انتقادات شخصيتها في مسلسل العتاولة 2، قائلة: كنت متوقعة نجاح دوري ولكن اللي حصل كان أكتر من توقعاتي بكتير، ولكن مش أول مرة يتعمل دور راقصة في رمضان، يمكن المشاكل كانت في حاجات تانية وأنا كنت مبسوطة جدًا لما اتعرض عليا الدور.
وتابعت مي القاضي: كنت عايزه أعمل تغيير ولكن مش للدرجة اللي طلع بيها مكنتش دي النية ولا دي توقعاتي ولما اتفرجت اتخضيت زيي زي الناس، بس تمام عدت، كانت فترة صعبة جدًا ومكنتش متوقعة الانتقادات تبقى بالدرجة دي، اللبس كان فيه حاجات زيادة ولكن خلاص زي ما كانت في انتقادات في ناس حبت ده، والانتقادات دي وقتها تعبتلي نفسيتي جدًا.
