مي القاضي: مش ندمانة على دوري في العتاولة.. ومش أول مرة يتعمل راقصة في رمضان
علقت الفنانة مي القاضي، على الانتقادات التي طالتها بسبب تقديمها شخصية راقصة في مسلسل العتاولة 2، بطولة الفنان أحمد السقا، والفنان طارق لطفي، والذي عُرض في السباق الرمضاني الماضي 2025.
وقالت مي القاضي، في لقائها مع القاهرة 24: كنت متوقعة نجاح دوري ولكن اللي حصل كان أكتر من توقعاتي بكتير، ولكن مش أول مرة يتعمل دور راقصة في رمضان، يمكن المشاكل كانت في حاجات تانية وأنا كنت مبسوطة جدًا لما اتعرض عليا الدور.
وتابعت مي القاضي: كنت عايزه أعمل تغيير ولكن مش للدرجة اللي طلع بيها مكنتش دي النية ولا دي توقعاتي ولما اتفرجت اتخضيت زيي زي الناس، بس تمام عدت، كانت فترة صعبة جدًا ومكنتش متوقعة الانتقادات تبقى بالدرجة دي، اللبس كان فيه حاجات زيادة ولكن خلاص زي ما كانت في انتقادات في ناس حبت ده، والانتقادات دي وقتها تعبتلي نفسيتي جدًا، علشان أدواري دايمًا رقيقة الناس بيحبوني أوي، فبعد العتاولة كانت دي أول مرة اتشتم، هي حصلت لكل الناس بس كانت تقيلة وصعبة عليا أوي.
مي القاضي: والدتي حذرتني من ملابس الراقصة في العتاولة
وأوضحت مي القاضي، أن والدتها حذرتها من ملابس شخصية الراقصة، قائلة: أخدت رأي والدتي طبعًا ولكن هي حذرتني وقالت خلي بالك من اللبس، ولكني مش ندمانة على الدور يمكن الناس متقبلتهوش في رمضان وده موضوع تاني أو مش كل الناس بعض الناس، فممكن أعمله تاني ولكن مش دلوقتي، وهخلي بالي من حاجات كتير مش بس اللبس.
