ميدو: الزمالك على الطريق الصحيح.. ومتفائل بالموسم الجديد
علق أحمد حسام ميدو لاعب نادي الزمالك وعضو لجنة التخطيط السابق في النادي، على بعض الأمور التي تخص فريق كرة القدم بالقلعة البيضاء خلال الفترة الجارية، خاصةً بعد الإعلان عن التعاقد مع مدير فني جديد والجهاز الفني بالكامل.
تصريحات أحمد حسام ميدو
وقال ميدو في منشور له عبر حسابه على إكس: اللي بيحصل في الزمالك دلوقتي عظمة وطول عمري بحلم إن فريق الكورة يتقفل عليه ويبقى معسكر الزمالك كأنه ثكنة عسكرية، وأنا متفائل خير إن فريق الكورة على الطريق الصحيح.
وأضاف: بقالنا سنين بنعاني من تسريب أخبار الفريق بقالنا سنين بتعاني من الناس اللي فاكرين الزمالك ورث شرعي وإن الشغل فيه حق مكتسب حتى ولو معندكش أي مؤهلات، أنا والله ما ليا مصلحة مع أي حد جوه النادي دلوقتي ولا حتى بتكلم مع أي حد جوه النادي لا بكلم حد ولا برد على حد.
واختتم: قررت إن الفترة الحالية أرجع مشجع بس، أرجع أروح ماتشات الزمالك من غير ما يكون ما بيني وبين أي مسؤول في النادي أي كلام وأنا كزمالكاوي مبسوط جدا ومتفائل إن شاء الله إن الزمالك بنظامه الاحترافي الجديد هيكون منافس قوي على كل البطولات اللي هيشارك فيها الموسم ده.
