حلا شيحة تكشف سبب انتكاستها: مداخل الشيطان كتير.. وكنت بقول لو موت أكيد هدخل الجنة
كشفت الفنانة حلا شيحة، عن سبب انتكاستها وخلعها الحجاب خلال الفترة الماضية وعودتها له من جديد، مؤكدة أن أبنائها كانوا أكبر دافع للعودة للفن من جديد في محاولة منها لتوفير معيشة تناسبهم، موضحة أنها تشعر بالسكينة حاليًا بعد تركها للفن وعودتها للحجاب والعيش برفقة أبنائها في كندا.
وقالت حلا شيحة، في مقطع فيديو عبر قناتها بموقع يوتيوب: الانتكاسة حصلتلي لأن الخوف تملك مني، ومداخل الشيطان كتير مهما كان الإيمان قوي، أنا حياتي كانت صعبة سنين بعد الجواز وإحساس الأم عايزة تعمل كل حاجة لـ ولادها ويبقوا عايشين في حتة تليق بيهم، وده تعب كل ست في العالم، وربنا قال إن الأولاد ممكن يكونوا فتنة، وفي أمور في الدنيا بتفتنا عن طاعة ربنا علشان كده اسمها فتنة يعني ملغبطة ومغيبة وضبابية.
حلا شيحة تكشف سبب انتكاستها: مداخل الشيطان كتير.. وكنت بقول لو موت أكيد هدخل الجنة
وأضافت حلا شيحة: أحيانًا الإنسان إيمانه بيضعف مش علشان حبه لـ ربنا قل ولا علشان مبيعملش الطاعات، أنا كنت قريبة من ربنا وبحب ربنا وبس لما الخوف تملكني أوي وحبي الزايد للأولاد اتفتنت، وأحيانًا المؤمن بيُصاب بتعب نفسي وابتلاء من عند ربنا وأنا منجحتش في الاختبار ده، ومن كتر التعب النفسي اللي كنت فيه وقتها من نواحي كتير أوي، وأنا عمري ما كنت أفكر أني ممكن أسيب الجمال اللي فيه مع ربنا وحبي ليه، لدرجة أني كنت بقول أنا لو موت دلوقتي أكيد هدخل الجنة من كتر ما قلبي كان قريب من ربنا وحاسة بـ سكينة وسلام، وكنت بحب الحجاب الشرعي ولبست النقاب وقتها، واختارت جوزي وقتها بناء على رغبتي أنه شخص مناسب لـ ديني وقربي من ربنا.
وواصلت: متتريقوش على الانتكاسة لأن التوبة مذكورة في القرآن ومش عيب ومش حاجة وحشة، إحنا بنسمع مصطلحات كتير في الدنيا وبنبقى فرحانين بيها، اشمعنى المصطلحات الإيمانية بتضايقنا، أنا لما رجعت مكنتش متذبذبة ولا مترددة زي ما الناس بتقول، ولكن دي كانت مرحلة انتقالية في حياتي لغبطتني، وفي أبواب كتير صعبة وأنا متأكدة أن ستات كتير مروا بنفس تجربتي، بس رحمة ربنا أن أنا عندي سنين من الحب والقرب وحسيت أن ربنا هيردني، ومش سهل خالص أنك تكون مشهور ومش عايز تكمل ده، الموضوع كان محتاج مني جهاد كبير، وأنا حاسة أني نجحت في الاختبار التاني، كان شديد جدًا ومكنش سهل عليا، حاولت أكون الشخص التاني اللي عايش حياة عادية مع الناس ولكن مقدرتش لأن كان في صراع داخلي أني في حلا اللي بتحب ربنا، وحلا اللي راحت في طريق تاني.
حلا شيحة تكشف تفاصيل رؤية قبول توبتها
واستكملت: البُعد عن ربنا صعب، وساعات بقول الناس اللي عايشة بعيد عن ربنا عايشين إزاي، أنا جربت الاتنين عيشت بعيد وقريب من ربنا والموضوع صعب، لما تقرب من ربنا هيبقى في صبر وبتقوى بالإيمان اللي جواك، وأنك تعرف الحلال والحرام وده في حد ذاته نعمة عظيمة، قعدت كده سنين ولبست الحجاب تاني وملبستوش علشان اتجوزت أنا بحب الحجاب ودايمًا عايزة أبقى في الحتة دي، ولكن الظروف مساعدتنيش وقلعت الحجاب تاني وحاولت أكمل حياتي، بس مكنتش المرة دي مرتاحة خالص وكان من جوا ضلمة، فضلت في الحالة دي لغاية قبل ما أنزل كندا بشهر ومن كتر ما كنت تعبانة نفسيًا، كنت بصلي وبكلم ربنا وحسيت أني من فترة طويلة رجعت أنده لـ ربنا تاني وقولتله متسبنيش أنا مش عارفة أعمل إيه أنا تعبانة أوي.
وكشفت حلا شيحة، تفاصيل الرؤية، قائلة: أول ما سلمت من الصلاة جالي الرد ونمت على سجادة الصلاة سمعت صوت حلو أوي مش عارفة كان شيخ ولا إيه وعمال يقول أدعية وبقيت أردد وراه، وشفت نفسي ماشية في البيت حاطة إيدي على قلبي وبقول أيوة يا رب حاضر يا رب بحبك يا رب، ومن كتر ما حاسة أنه حلم مش قادرة أقوم، لما صحيت بقيت مش مصدقة أن ربنا ممكن يمن عليا تاني بعد رؤية يوم القيامة أو يهديني النوع ده من الهداية، محدش يفقد اليقين نهائي، قعدت وشفت شريط حياتي قدامي وكأني سمعت صوت ربنا بيقولي انتي نجحتي في الاختبار، وحسيت أن كل حياتي اللي انتكست فيها أنها اتفقلت في صندوق وطار وأنا بتفرج عليه وأنا مع ربنا وحاسة بسلام نفسي.
