الشاعر مصطفى حدوتة ردًا على اتهامه بسرقة كلمات أغنية قالوا إيه لـ محمد رمضان: عايزين يشهروا أغنيتهم على حسي
رد الشاعر الغنائي مصطفى حدوتة، على اتهامه بسرقة كلمات أغنية قالو إيه للفنان محمد رمضان، موضحًا أنه يختار كلمات أغانيه بعناية شديدة والجزء المقصود مثل شعبي ولا يندرج تحت حقوق الملكية الفكرية.
وقال مصطفى حدوتة، في لقائه مع القاهرة 24: عمري ما أخدت كوبليه من حد، كل شغلي بختار فيه كل كلمة بعناية وتركيز جدًا، كوبليه يعني 8 شطرات على الأقل، ممكن يكون اللي حصل توارد أفكار، ممكن نقول مثل شعبي يتحط في 60 أغنية، وعندنا في العشوائيات في كلمة بتتقال أنا أي أرض نزلتها كسبت محبة أهلها، دي بتتقال بقالها 12 سنة، فأنا لما آجي أحط كلمة زي دي في أغنية وحد يجي يقولي أنا قولتها في أغنية من كام سنة، لأ في حاجة اسمها حقوق الملكية الفكرية، الجزئية دي لا تحتمل حقوق الملكية الفكرية، دي كلمة دارجة وكل الناس تقدر تقول ده في أغنية.
وواصل مصطفى حدوتة: لما دخلت أشوف الأغنية اللي الشاعر بيقول عليها لقيتها جايبة 6000 مشاهدة، يعني أنت حسبت جوا دماغك إن مصطفى حدوتة من ضمن الـ6 آلاف اللي سمعوا الأغنية من بين الـ 110 ملايين شخص في مصر؟ عايزين يشهروا أغنيتهم على حسي.
تفاصيل أزمة أغنية قالوا إيه لـ محمد رمضان
ومن ناحية أخرى، سبق وتقدم الشاعر الغنائي وليد رياض، بشكوى ضد الفنان محمد رمضان والشاعر مصطفى حدوتة، في جمعية المؤلفين والملحنين، ونقابة المهن الموسيقية، بتهمة سرقة كلمات من أغنية أنا المليونير لـ رياض، في أغنية قالوا إيه لـ محمد رمضان.
