بتضيع موهبتك.. عبد العزيز مخيون يروي عتاب سعاد حسني له: ندمت لأني ما سمعتش كلامها
كشف الفنان الكبير عبد العزيز مخيون، عن موقف جمعه بالنجمة الراحلة سعاد حسني، عبرت فيه عن عتابها له بشأن طريقة إدارته لمسيرته الفنية.
وقال مخيون في برنامج كلام الناس مع ياسمين عز على قناة MBC مصر: سعاد سمعتني بتكلم مع الإنتاج، وبعدها قالتلي: إنت مش عارف تدير نفسك وموهبتك.. ازاي بتتكلم مع بتوع الإنتاج بالشكل ده؟ ولازم أجيب حد يدير شغلي، لأن إدارة الموهبة مهمة جدا، والثقافة لوحدها مش كفاية.
وأضاف: للأسف مسمعتش كلامها، وندمت إني معملتش كده، لأن البساطة بيتفهم غلط في الزمن ده.
عبد العزيز مخيون يروي تفاصيل لقائه مع عبد الوهاب
وتحدث الفنان عبد العزيز مخيون، عن لقائه المؤثر بالفنان الكبير محمد عبد الوهاب، بعدما قدم مخيون شخصية عبد الوهاب دون علم الأخير، ضمن مسلسل أمير الشعراء أحمد شوقي.
وقال مخيون: اندهش لما قولتله إني بقدم شخصيته من غير ما هو يعرف، ولما كلمته في التليفون، اعتذر يكمل المكالمة معايا، وبعد ما احترت شوية كلمته تاني، قالي: إنت برضو، وشرحتله الوضع، فقالي: تعالى لي بكرة الساعة 1.
وتابع مخيون: قابلته وقعدت معاه ساعة كاملة، وكنت حاسس إنه سعيد، لأنه حس إني رجعته لذكرى جميلة وهي غناءه في حفل زفاف نجل أحمد شوقي في حياته وخلال الجلسة، صححلي حاجات كتير عن شخصيته وسلوكه وأسلوبه.
وأشار إلى أن عبد الوهاب أوصاه بالظهور بإطلالة متكاملة، وقال له: لازم تلبس في الإيافة الكاملة وقالي إن فيه شبه بيني وبينه.
