علي قدورة: فيه فنانين مش مقتنعين إن الأغاني حرام.. وحذفت اللي أقدر عليه وعمري ما هرجع تاني
علق علي قدورة مؤدي المهرجانات الشعبية المعتزل، على الجدل الذي أُثير خلال الفترة الماضية بسبب انتقادات الجمهور لوصية الفنان بحذف أغانيه عقب وفاته، مؤكدًا أنه لن يعود للغناء مرة أخرى وأن اعتزاله بشكل نهائي.
وقال علي قدورة، في تصريح خاص لـ القاهرة 24: أنا حذفت اللي أقدر عليه من الأغاني بتاعتي، وفي عدد من الشركات متقبلتش الموضوع، وفي فنانين كتير مش عارفين ولا مقتنعين أن الأغاني حرام، وأي حد بيغني مش هيقتنع أن الأغاني حرام وإلا مكنش غنى، الحلال بيّن والحرام بيّن.
وتابع علي قدورة: اللي بيهاجم حذف الأغاني كارثة ولكن إحنا مش هنمسك لسان الناس وفي يوم الحساب هنعرف إيه اللي لينا واللي علينا، ولا اللي دخل جامع عاجب ولا اللي دخل خمارة عاجب، الناس اتكلمت على ربنا والرسول مش هيتكلموا على بني آدمين؟، الواحد بيرضي رب الناس مش الناس.
وعن إمكانية عودته لـ الغناء مرة أخرى، فعلق علي قدورة: مستحيل أرجع للغناء تاني، في حد يكون غرقان ويلاقي نجدة ويرجع تاني؟، ربنا يثبتني.
علي قدورة
ومن جهة أخرى، كان علي قدورة أعلن اعتزاله الغناء، حيث كتب عبر حسابه بموقع انستجرام: السلام عليكم في يوم جمعة مبارك أنا علي عبد القادر السيد، الشهير بـ علي قدورة، كنت مغني قبل النهاردة، فيه حاجة حصلتلي مش عارف إيه هي بس الحاجة دي هي اللي بتخليني أتكلم دلوقتي، أنا بريء من كل عمل أو مزيكا عملتها في حياتي وبعلن اعتزالي مجال الأغاني لحد ما يفتكرني ربنا، ربنا يسامحني على أي حاجة أنا عملتها في حياتي، أو أي حاجة صدرت مني دون قصد، يا رب قربني ليك وافتحلي باب رزق يرضيك.
