نجل ضحية حادث إمبابة يروي تفاصيل مصرع والده: دماغه جات تحت العجلة.. وقعد 10 ساعات على الأجهزة
روى عبد الله هاني، نجل المجني عليه في حادث دهس مأساوي بمنطقة إمبابة، تفاصيل اللحظات الصعبة التي شهدها، بعد أن فقد والده حياته وأصيب 4 آخرين، نتيجة تصرف طائش من سائق سيارة مسرعة من نوع 2 كابينة.
نجل ضحية حادث إمبابة يروي اللحظات الأخيرة قبل وفاة والده
وقال نجل الضحية في تصريحات خاصة لـ القاهرة 24: والدي عنده كشك سجاير في إمبابة، بيسترزق منه بالحلال، وكان واقف مع جماعة من المنطقة قدام الكشك، وكانت في عربية 2 كابينة واقفة فجأة اتحركت بسرعة وعدت نحيتنا جاية بسرعة جنونية، خبطتنا كلنا ودخلت في المحل، ودهست 5 أشخاص من بينهم والدي وابن عمي، دماغ أبويا جات تحت العجلة وقعد 10 ساعات على الأجهزة.
وأشار عبدالله إلى أن السائق فر هاربًا من مكان الحادث، قائلًا: اللي كان سايق العربية هرب بعد ما خبطهم، لكن اللي كان قاعد جنبه واحد مقدرش يهرب، والشرطة قبضت عليه، ومن خلاله وصلوا للمتهم اللي كان سايق، وتم ضبطه بالفعل، لكن بعد كده أخلي سبيله على ذمة القضية.
وأكد نجل المجني عليه، أنهم يعيشون مأساة بعد فقدان والده، موضحًا: كان لسه حاضر خطوبتي وكنا مبسوطين وأختي على وش جواز وحياتنا كلها اتدمرت، وإحنا مش طالبين غير حقه، عايزين القانون ياخد مجراه.
واختتم حديثه قائلًا: عملنا المحضر في القسم، والواقعة حصلت من 3 أيام، وكل اللي بنطلبه حق أبويا".
