محمد كريم: فيلم The Gunslingers يؤكد نجاحي في هوليوود للمرة السابعة.. وقدمت أدوار ملهاش علاقة بإني عربي
تحدث النجم محمد كريم، عن تجربته في فيلم The Gunslingers وهو من نوعية Western Cowboy، والذي يظهر فيه النجم محمد كريم كأول ممثل عربي من الشرق الأوسط يجسد بطوله رعاة البقر في أحد أفلام الغرب الأمريكية بهوليوود.
وقال محمد كريم، في ندوته بـ القاهرة 24: أول حاجة نجحت بيها في الفيلم ده تأكيد أني أقدر أعمل أفلام وأدوار ملهاش علاقة خالص أني مصري أو عربي، ده نجاح بأكد عليه للمرة السابعة، وبقول الحمد لله لأني لو كنت عملت أدوار نمطية من البداية مكنتش هعرف أخرج منها، أو دور عربي وخلاص كان كل الأدوار اللي هتيجي من نفس العينة.
وأعرب محمد كريم، عن سعادته الكبيرة بالنجاح الذي حققه في هوليوود من خلال فيلم The Gunslingers، قائلًا: تاني حاجة الدور نفسه شخصية راعي البقر اللي قدمتها دي هما هناك معروف شكله عامل إزاي، فيه ممثلين في هوليوود كل أفلامهم يبقى عمل 150 أو 200 فيلم كلهم عن رعاة البقر، والفيلم ده كان من ضمن الحاجات الأساسية اللي في حياتي عايز أحققها في هوليوود، لأن دي حاجة أمريكية صميمة جدًا وأني أدخل وأنجح فيها دي حاجة كبيرة جدًا وساعدتني كتير هناك، والفيلم لما نزل في هوليوود حسيت أن النجاح مختلف عن الأفلام اللي عملتها قبل كده.
