محمد كريم يكشف سبب غيابه عن الأعمال المصرية: عندي عقود متفق عليها خارج مصر.. وأنا مركز في شغلي
كشف الفنان محمد كريم، سبب ابتعاده عن الساحة الفنية في مصر، موضحًا أنه مرتبط بالعديد من عقود الأفلام في هوليوود، بجانب الحديث عن حرصه الشديد للوجود بكثرة على مواقع التواصل الاجتماعي.
وقال محمد كريم، في ندوته بـ القاهرة 24: الفكرة كلها أن عندي فريق برا بيدير شغلي كله وعندي عقود تمثيل لازم أخلصها في مواعيد معينة، الدنيا برا بتبقى مرتبة وواضحة، أنا حابب جدًا أكون موجود في مصر، ولكن عندي عقود متفق عليها، يعني ببقى عارف كمان سنة هيبقى عندي عمل إيه.
أما عن سبب قلة وجوده على مواقع التواصل الاجتماعي، علق محمد كريم: أنا مُقل على السوشيال ميديا لأني مركز في شغلي، وعايز أعمل حاجة كويسة وعارف إن شغلي بياخد وقت كبير، ومينفعش أتكلم عن شغلي وطول الوقت بسمع أسماء كبيرة راحت منها أفلام لأنهم اتكلموا من غير ما يقصدوا، فأنا حريص جدًا، وأنا خلاص دخلت في منظومة السينما هناك فلازم أعمل حاجة يكونوا فاهمينها، فأنا بكتب منشورات يكون هنا وهناك فاهمينها، الوطن العربي يهمني جدًا ودايمًا متابعين.
محمد كريم يتحدث عن تجربته في فيلم The Gunslingers
كما تحدث النجم محمد كريم، عن تجربته في فيلم The Gunslingers، قائلًا: أول حاجة نجحت بيها في الفيلم ده تأكيد أني أقدر أعمل أفلام وأدوار ملهاش علاقة خالص أني مصري أو عربي، ده نجاح بأكد عليه للمرة السابعة، وبقول الحمد لله لأني لو كنت عملت أدوار نمطية من البداية مكنتش هعرف أخرج منها، أو دور عربي وخلاص كان كل الأدوار اللي هتيجي من نفس العينة.
وأردف: الفيلم ده كان من ضمن الحاجات الأساسية اللي في حياتي عايز أحققها في هوليوود، لأن دي حاجة أمريكية صميمة جدًا وإني أدخل وأنجح فيها دي حاجة كبيرة جدًا وساعدتني كتير هناك، والفيلم لما نزل في هوليوود حسيت إن النجاح مختلف عن الأفلام اللي عملتها قبل كده.
