محمد كريم: ابتعدت عن السوشيال ميديا لأني مركز في شغلي.. وThe Gunslingers نقلة كبيرة في هوليوود
أوضح الفنان محمد كريم سبب ابتعاده النسبي عن مواقع التواصل الاجتماعي خلال الفترة الماضية، مؤكدا أن تركيزه الكامل على مشاريعه الفنية هو السبب الرئيسي وراء قلة ظهوره، خاصة مع انشغاله بتقديم أدوار نوعية في السينما العالمية.
وقال كريم في ندوته بالقاهرة 24: أنا مقل عن السوشيال ميديا لأني مركز في شغلي، وعايز أعمل حاجة كويسة، وعارف إن شغلي بياخد وقت كبير، ومينفعش أتكلم عن شغلي وطول الوقت بسمع أسماء كبيرة راحت منها أفلام لأنهم اتكلموا من غير ما يقصدوا، فأنا حريص جدا.
وأضاف: أنا خلاص دخلت في منظومة السينما هناك، فلازم أعمل حاجة يكونوا فاهمينها، وأنا بكتب منشورات يكون الوطن العربي والغرب فاهمينها، الوطن العربي يهمني جدا ودايما متابعين.
محمد كريم عن فيلم The Gunslingers: لعبت دورا بعيدا عن كوني عربي أو مصري
وتحدث محمد كريم عن أحدث تجاربه السينمائية في هوليوود من خلال فيلمه الجديد The Gunslingers، معتبرا إياه نقلة مهمة في مسيرته الدولية، خاصة بعد نجاحه في كسر الصورة النمطية عن الممثل العربي في الغرب.
وقال كريم: أول حاجة نجحت بيها في الفيلم ده إني أثبت إني أقدر أعمل أفلام وأدوار ملهاش علاقة خالص إني مصري أو عربي، وده نجاح بأكد عليه للمرة السابعة، الحمد لله.
وأوضح أن اختياره لأداء أدوار لا تعتمد على الهوية العرقية أو النمط الثقافي كان قرارا استراتيجيا منذ بداياته في هوليوود، قائلا: لو كنت عملت أدوار نمطية من البداية مكنتش هعرف أخرج منها، وكنت هتحبس في دور العربي وخلاص.
وواصل حديثه عن تجربته في The Gunslingers قائلا: الفيلم ده من ضمن الحاجات الأساسية اللي في حياتي كنت عايز أحققها في هوليوود، لأنه حاجة أمريكية صميمة جدا، وإني أنجح فيها دي حاجة كبيرة جدا، وساعدتني كتير هناك.
وأشار إلى أن ردود الفعل على الفيلم كانت مختلفة تماما عن تجاربه السابقة، مؤكدا: لما الفيلم نزل في هوليوود حسيت إن النجاح مختلف عن الأفلام اللي عملتها قبل كده.
