زوجة تطلب الطلاق: مش بيكلمني غير برسائل على واتساب وإحنا في نفس البيت
رفعت زوجة شابة دعوى طلاق أمام محكمة الأسرة، بسبب تصرفات غريبة من زوجها، مؤكدة أنه أصبح يتجنب الحديث معها تمامًا، ويفضل التواصل من خلال الرسائل فقط، رغم وجودهما تحت سقف واحد.
قضايا محكمة الأسرة
قالت الزوجة في دعواها: كنت فاكرة إن الخلافات بين الأزواج بتتحل بالكلام.. لكن جوزي اختار يسكت، ولو عايز حاجة مني يبعتها على الواتساب، حتى لو قاعد في الأوضة التانية.
وأضافت: حاولت ألفت نظره، أقوله إن ده مش طبيعي، وإنه لازم نفضل قريبين من بعض، لكنه كان بيرد عليا بجملة واحدة، إن الكلام بيجيب مشاكل.
وتابعت: كنت بحس إني عايشة مع ضيف مش مع جوزي.. لا خروج، لا كلام، لا ضحك، حتى لما تعبت مرة وطلبت ييجي معايا للدكتور، قاللي: بعتلك لينك عربية أوبر.
وواصلت: مش عايزة رفاهية، كنت عايزة عشرة وشراكة.. لكن لقيت نفسي لوحدي، حتى الجملة اللي بتطمن الست أنا جنبك مبقاش يقولها.
الزوج من ناحيته قال إن شخصيته مش كلامية، وإنه بيوفر الهدوء وبيكره المناقشات الطويلة، في حين أن المحكمة قررت تأجيل الجلسة لمحاولة الصلح.
