جوري بكر تنتقد تصرفات الشباب بالساحل: بتتكلموا إنجليزي وتعوجوا لسانكم على العمال ليه؟
انتقدت الفنانة جوري بكر، تصرفات الشباب في الساحل الشمالي، معربة عن استيائها الشديد بسبب حديث الشباب المستمر باللغة الإنجليزية رفقة العاملين بالساحل الشمالي، موجهة لهم عددا من النصائح للتعامل مع العمالة.
جوري بكر: بتتكلموا إنجليزي وتعوجوا لسانكم على العمال ليه؟
وقالت جوري بكر، في مقطع فيديو عبر ستوري حسابها بموقع إنستجرام: وأنا بكلم ابني واحدة تقولي أنتي مبتكلميش ابنك إنجليزي ليه؟ أنتي مالك بتدخلي في تربية ابني ليه؟ والأهم في الموضوع إحنا ليه كلنا لما بنيجي الساحل بنتكلم إنجليزي إحنا ليه مش مسهلين على بعض، ما تتكلموا عربي يا جماعة، أنا كنت هذا الشخص وكلنا خطائين، لغاية ما صديقة ليا قالتلي عايزة توصلي وتشتغلي في البلد دي اتكلمي عربي علشان الناس تفهمك وتحبك وتوصلي ليهم، وده اللي أنا بدأت مؤخرًا أعمله.
وأردفت جوري بكر: سهلوها على بعض وسهلوها على الشباب اللي شغالين هنا، بتكلموهم إنجليزي وبتعوجعوا لسانكم عليهم ليه؟ زمان كنت بحب أتكلم بصوت واطي وبالراحة دلوقتي أنا أم وعندي طفل لازم صوتي يسمعه من على بُعد 100 متر، دخلت أجيب ساندوتش أو كوباية قهوة بلاقيهم بيتكلموا إنجليزي والعمالة مش فاهمنها، وهما غصب عنهم مش فاهمين وأنا كمان في حاجات مببقاش فهماها.
وواصلت: الناس اللي شغالة هنا ولاد ناس جدًا ومحترمة وبيشتغلوا فترة الصيف عشان يأمنوا فلوس لنفسهم علشان جامعتهم أو هيتجوزوا، أنا بحب الناس اللي بتشتغل وتتعب وتشقى وتحس بقيمة الجنيه، وبتبسط لما بحس أن الناس اللي بتحبني هما الجارسونات والشيفات.
واختتمت جوري بكر: خليكم رحيمين بيهم، اتعاملوا عادي وسهلوها على بعض، مش علشان إحنا في الساحل لازم نبقى مختلفين، مينفعش أدخل عيادة ألاقيكي لابسة مايوه حضرتك ده ألبسيه على البحر، يا جماعة راعوا الناس أرجوكم في ناس كبار وأهالي عشان الناس متهزقناش بس نلبس الحاجة في أماكنها، ونكلم الناس عربي.
