حاول خلع ملابسه.. القبض على سائق أحد تطبيقات النقل الذكي بعد استغاثة فتاة
ألقت الأجهزة الأمنية القبض على سائق أحد تطبيقات النقل الذكي، بعد ارتكابه أفعالًا غير أخلاقية، والتحرش بفتاة لفظيًا بجانب محاولته خلع ملابسه خلال الرحلة.
القبض على سائق أحد تطبيقات النقل الذكي بعد استغاثة عميلة
وشاركت فتاة عبر منصة فيسبوك منشورًا، تشكو فيه من سائق أحد تطبيقات النقل الذكي، بسبب محاولات التحرش بها لفظيًّا، ومضايقتها من خلال النظر في المرآة والغناء بصوت عالٍ خلال استقلالها رحلة للتجمع.
وجاء في المنشور: طلبت رحلة من مبنى B Square مدينة نصر لـ التجمع الخامس، جالي سواق تطبيق نقل ذكي، من أول ما كلمته وكان غريب، وبكلمه بسأله هو فين، قالي: أنا بيني وبينك كام دقيقة، ومش عارفة قال حاجة كده ما سمعتهاش، وبعدها لقيته بيقولي يا حبيبتي، وصوته راجل كبير، فقولت: راجل كبير، ما خدتش في بالي وعديت الدنيا، ونزلت من المبنى لقيته.
وأضافت الفتاة: ركبت، وأول ما ركبت وأنا حاسة بحاجة غريبة، ماكنتش عارفة هي إيه؟ مش عارف الطريق، وفاتح اللوكيشن، ومش ماسك الموبايل.. ولقيته خد يمين من السويس عشان يمشي من محور شينزو آبي ويوصل للتجمع، وعمال يبص يمين وشمال جامد، وبيلوح رقبته أوي، وخدت بالي إنه بيبصلي في المراية، ومشغّل أغاني وبيغني معاها بصوت عالي.. ولما بسأله: بتبص يمين وشمال ليه كده؟ قالي: عادي، ببص على المرايات والطريق، هو انتي خايفة ولا إيه؟
وأكملت الفتاة: لقيته ماسك الشمال على محور شينزو آبي، ولقيته فجأة بيفك حزام السواقة، وبعدها لقيته بيقلع هدومه، وفضلت أصرخ فيه، وفتحت الباب وكنت هَنزل من العربية وهي ماشية، لقيته وقف، وقالي: انزلي انتي حرة.. وفضلت واقفة على الطريق وهو ما قفلش الرحلة أصلًا.
