خايفين حالته تدهور.. أسرة صغير من بني سويف تستغيث لعلاجه بمستشفى 57357 من سرطان الغدد الليمفاوية |خاص
استغاث عم أحد الصغار من محافظة بني سويف لعلاج نجل شقيقه من مرض سرطان الغدد الليمفاوية، مطالبًا مستشفى 57357 بالاستجابة وقبول الطفل للعلاج من المرض قبل تدهور حالته وانتشار الورم في جسده.
أسرة صغير من بني سويف تستغيث لعلاجه في مستشفى 57357 من سرطان الغدد الليمفاوية
وقال أبانوب عطية عم الصغير في تصريحات خاصة لـ القاهرة 24: حالة ابن أخويا كاراس بدأت في شهر 4 اللي فات لاحظنا وجود مشاكل عنده وبعد الفحص اكتشفنا إن عنده سرطان الغدد الليمفاوية، طبعًا كل يوم الجرح اللي في رقبته بيكون أعمق من الأول وممكن لا قدر الله ينتشر في جسمه كله، لأن يوم عن يوم حالته بتسوء وكل ما يتأخر في دخول المستشفى فرصته في النجاة هتكون أقل.
وتابع: حد من الدكاترة قالنا نروح مستشفى 57357 لأنه المكان الوحيد اللي هيساعده بالعلاج، وبالفعل خدنا دور في المستشفى بس للأسف متأخر أوي لأن مفيش أماكن فاضية وده ممكن يزود حجم الخطورة اللي بيعيشها الطفل ويأثر عليه خاصة إنه دلوقتي تعبان جدًا من مضاعفات المرض.
واختتم عم الصغير حديثه: كل اللي إحنا عايزينه أن الولد ياخد دور بدري في المستشفى بحيث المضاعفات متزيدش معاه والجرح اللي في رقبته يكون أكبر من كده ويقدر يخف ويمارس حياته بشكل طبيعي جدًا ووظيفي.
