مصطفى كامل يوضح عبر القاهرة 24: أخدت على خاطري لما أنغام مردتش وفهمت بعدين.. وربنا يطمنا عليها
أوضح الفنان مصطفى كامل، نقيب المهن الموسيقية، حقيقة ما قصده من تصريحاته الأخيرة التي تداولت خلال الساعات الماضية، حول تواصله مع المطربة أنغام للاطمئنان على حالتها الصحية، وعدم ردها عليه.
وقال مصطفى كامل خلال تصريحاته لـ القاهرة 24: أول كلامي بدعي لأنغام ربنا يشفيها وترجع لجمهورها ومحبيها بألف سلامة، الموضوع بدأ لما كنت في مهرجان جرش من 12 يوم واتسألت عن آخر تواصل ليا مع أنغام وقولت إني كلمتها من شهر لما شوفت مداخلتها مع الإعلامية لميس الحديدي، وعرفت إن هي تعبانة.
وتابع مصطفى كامل: لما عرفت إن أنغام تعبانة حاولت أكلمها مردتش، بعتلها رسالة مردتش، اتصلت بـ لميس الحديدي وقولتلها بلغي سلامي لـ أنغام لأنها مردتش، ثم لقيت أنغام بعدها بكام يوم شفاها الله وبتحيي حفلات جديدة، وقتها أخدت على خاطري إن هي مردتش عليا كل ده.
مصطفى كامل: أخدت على خاطري لما أنغام مردتش وفهمت بعدين
وأضاف مصطفى كامل: بس اللي حصل وقتها إني قولت الكلام ده في اللقاء اللي حصل من 12 يوم، وقتها كنت هعرف منين إن أنغام هتتعب وتسافر خارج مصر، وقت ما قولت الكلام كانت حالتها كويسة لسة، ومعرفش إن اللقاء هينزل اليومين دول ومعرفش إيه سبب ده.
وأردف مصطفى كامل: اللي حصل إني اتعرضت لحملة ممنهجة بيتعرض لها دايما أي حد بيحترم الكيان اللي بيديره، واللي حصل ده صدفة إن أنغام تتعب بعد كلامي ده بـ 7 أيام.
واختتم مصطفى كامل حديثه: بعد ما علمت بـ تعب الأخت العزيزة أنغام وإنها خارج البلاد، مفيش كلام في الماضي ولا في زعل، كل اللي نقوله دلوقتي ربنا يطمنا عليكي ويرجعك لجمهورك ولولادك بألف سلامة.
تصريحات مصطفى كامل
وحول تصريح مصطفى كامل الذي أثار كل هذا الجدل، كان قال مصطفى كامل، في تصريحات تليفزيونية: تواصلت مع أنغام للاطمئنان على حالتها الصحية، لكنها لم ترد، فلم أرسل رسالة أخرى، دوري كنقيب يحتم عليَّ السؤال عن الفنانين، ومن الطبيعي أن ترد على رسالتي، أنا لا أطلب منها أموالا سلفا.
ولكنه كما أوضح مصطفى كامل لاحقا، إنه قال تلك التصريحات قبل تعرض أنغام للوعكة الصحية الجديدة وسفرها خارج البلاد.
تطورات حالة أنغام الصحية
من جانبه، سبق وطمأن الإعلامي محمود سعد الجمهور على صحة أنغام، من خلال صفحته الرسمية بموقع فيسبوك، حيث علق: مع أنغام كل يوم ومع ابنها عمر، بطمّن على حالتها، وهي تعبانة وبتعاني من ألم جامد وفهي مشاكل ويمكن بعد 3 أو 4 أيام نشوف، والحكاية صعبة ومش عارفين إيه هيحصل ادعوا لها.
