كارمن سليمان: خطوة ألبوم أصح غلطة متأخرة.. وكنت خايفة من المنافسة
تحدثت الفنانة كارمن سليمان، عن ألبومها الجديد أصح غلطة، الذي تطرح أغانيه تباعًا على فترات متفرقة، بجانب الحديث عن المنافسة في موسم صيف 2025.
وقالت كارمن سليمان، في لقائها مع القاهرة 24: كان بقالي سنين بنزل أغاني سينجل، وخطوة الألبوم مكنتش سهلة خالص، كانت محتاجة وقت ومجهود واختيارات كتير وتفكير كتير علشان الألبوم يكون حاجة على بعضها حلوة، خطوة سعيدة بيها جدًا وكانت خطوة شايفة أنها متأخرة ولكن كل تأخيرة وفيها خيرة، وكل حاجة هتبتدأ فعلًا من هنا، وبقيت حابة أني أعمل ألبومات على طول.
وتابعت كارمن سليمان: بنزل أغاني الألبوم على أيام متفرقة لأني متعودة على الأغاني السينجل، فحبيت أن الألبوم مينزلش على بعض كله علشان مفيش أغنية الناس تغفل عنها.
أما عن المنافسة، فعلقت كارمن سليمان: كنت خايفة من المنافسة خاصة أن في أغاني كتير جدًا نازلة في وقت واحد، ولكني بحب المنافسة الشريفة، وبتبسط أن في أغاني كتير، ولكن اللي بشوفه ميزة أن مفيش حد شبه حد، كل واحد ليه الشكل بتاعه، فبحس أن العيب بس القلق ولكن الميزة أن كل واحد له شكل.
كارمن سليمان
ومن ناحية أخرى، تستكمل كارمن سليمان، طرح باقي أغاني ألبومها الجديد أصح غلطة، التي تتغنى خلالها بكلمات أحمد المالكي وألحان كريم نيازي وتوزيع شادي ديفيد وإنتاج مصطفى جاد، والكليب من إخراج ريم عيد.
