فتاة تستغيث من طبيب نساء وتوليد شهير بدمنهور بعد وفاة والدتها: أمي تعبت تعب عادي وماتت بسبب غلطة دكتور
نشرت فتاة تدعى نورا خالد، منشورًا لها عبر حسابها الشخصي بموقع التواصل الاجتماعي فيسبوك، تزعم خلاله وفاة والدتها نتيجة خطأ طبي، حيث قالت: أمي تعبت تعب عادي وماتت بسبب غلطة دكتور جاهل ومعدوم الضمير، تعبت راحت لدكتور نساء مشهور ش.هـ، قالها عندك ورم على الرحم ولازم نشيله، وبعدين إنتي عندك خمسين سنة وعندك أولاد، ومش محتاجة الرحم في حاجة، ونشيل الرحم بالمرة وعملها سونار ومطلبش أي إشاعات تبين حجم الورم.
وأضافت نورا خالد ابنة السيدة المتوفاة نتيجة خطأ طبي: الدكتور دخلها مركز للحقن المجهري من ترشيحه، والمستشفى اللي اختارها تعمل فيها العملية مفيهاش عناية مركزة حتى دخلها أوضة العمليات من غير ما يجهز أكياس دم ودخلها العملية في المركز اللي في دمنهور غير مجهزة أصلا لـ عملية كبيرة، وفي وسط العملية طلع يقول أنا لقيت ورمين كمان تحت الرحم، روحوا ادفعوا 4000 جنيه في الحسابات، هو في كده طالع من العملية عشان تطلب فلوس زيادة.
وأضافت نورا خالد ابنة السيدة المتوفاة نتيجة خطأ طبي: والدتي خرجت من العملية بعد 4 ساعات على الغرفة وفاقت لكنها كانت حاسة بـ آلام العملية طبيعي وجه يشوفها الساعة 6 العصر وقالها المفروض أديكى حقن سيولة بس ممكن نستنى شوية ورغم إن المكان غير مجهز قالها المفروض تباتي، وحاولوا يقوموها داخت منهم وبدأت حالتها تسوء جدا والمستشفى طبعا مفيهاش عنايه مركزة بدأت تصفر وتبيض وكان واضح عليها أعراض النزيف الداخلى وحاولوا يتواصلوا مع الدكتور والمساعدة بتاعته ردت وقالت الدكتور هيبقى يتواصل معاكم.
واستكملت تفاصيل الواقعة: وضعها الصحي بقى أسوأ واتصلوا بالعنايات المركزة لأكثر من مستشفى محدش راضى ييجى ياخد الحالة، إسعاف المستشفى العام بس اللي وافق والإسعاف لما طلع قال دى ماتت الله يرحمها ومحدش أخدها.. الدكتور المشهور رايح يعمل عملية كبيرة زى دى فى مستشفى حقن مجهرى غير مرخصة وبدون احتياطات من أكياس دم أو إشاعات طبية سابقة، الدكتور خرج في نص العملية يطلب فلوس زيادة لأنه وجد ورمين زيادة استدعوا وقت إضافي في العملية، أنت جزار مش دكتور.. أهلها مش هيسكتوا، وحسبي الله ونعم الوكيل.
وادّعت أن تقرير مستشفى الحقن المجهري أوفى بأن المتوفاة حدث لها جلطة متحركة على الرئة قبل اكتمال 24 ساعة بعد العملية، ولما سألوا عرفوا أن الجلطة دى بتيجى بعد العملية بفترة تكون المريضة مبتتحركش، والدكتور المشهور رفض يديها حقن السيولة بعد العملية.. المريضة وهي بتتغسل بعد وفاتها كانت بتنزف من مناخيرها جامد الله يرحمها ويحسن إليها.
