كانوا بيضايقونا من وإحنا في الكافيه.. أول تعليق من ضحية مطاردة طريق الواحات: مرعوبة من اللي حصل| خاص
تصدر حادث فيديو مطاردة عدد من الشباب على طريق الواحات لـ سيارة بها 3 فتيات تريند مواقع التواصل الاجتماعي خلال الساعات القليلة الماضية، وتتبع الشباب سيارة الفتيات بعد خروجهن من أحد الكافيهات بـ أكتوبر بغرض مضايقتهن، ما تسبب في اصطدام السيارة بأخرى، ونقل الفتيات للمستشفى، وأثار الفيديو حالة غضب واسعة بين مستخدمي السوشيال ميديا.
أول تعليق من ضحية مطاردة طريق الواحات
وقالت ضحية حادث طريق الواحات في تصريحات خاصة لـ القاهرة 24: كنت في الحي الأول بشرب قهوة في كافيه مع صحابي والشباب دول كانوا بيرخموا عليا من أول ما قعدت، لدرجة أنهم نقلوا ترابيزتهم في وشي وشربت القهوة أنا وصحابي وخرجنا، اتفاجئت بيهم أنهم فضلوا ماشيين ورانا ومدونيش فرصة أمشي أصلا فضلوا يضايقوني من اليمين والشمال.
وتابعت: كانت بالنسبالي صدمة كبيرة وهم عمالين يقولوا أقفي يا بت ويضايقونا، وطبعا معرفتش أتفادى اللي حصل ودخلت في العربية لأنهم ماشيين من اليمين والشمال حواليا وطبعا اتصدمت من اللي حصل، العربية بتاعتي اتدمرت وأنا وصحابي اتبهدلنا كل حاجة يعني اتكسرت، وطلعت من العربية من تحت الماتور طلعوني بالعافية، وصاحبتي دماغها اتفتحت والزجاج دخل في وشها.
