حمزة نمرة عن نجاح ألبومه: الطبيعي أكون مسموع في دوائر ضيقة لكن ربنا إداني أكثر مما أستحق
أعرب الفنان حمزة نمرة عن سعادته الكبرى بنجاح ألبومه الجديد، حيث أكد أنه في البداية كان متخوفا من نجاح أعماله وأغانيه، بسبب حرصه الدائم على التفرد، وتقديم أعمال جديدة للجمهور.
حمزة نمرة عن نجاح ألبومه: الطبيعي أكون مسموع في دوائر ضيقة لكن ربنا إداني أكثر مما أستحق
وكتب حمزة نمرة منشورا، عبر حسابه الرسمي بـ فيس بوك، قال فيه: زمان، لما كان حد يسألني في أي لقاء هل حاسس إنك مش واخد حقك فنيا؟، كنت بقعد أفكر شوية وأبقى مش متأكد من الإجابة، وغالبا بكون أقرب لفكرة إني فعلًا كدة، لحد ما في يوم قعدت بيني وبين نفسي وسألت نفسي السؤال ده بجد، واكتشفت إن ربنا إداني أكتر مما أستحق، ووصلني لأبعد مما يفترض إني أوصل له بحسابات الدنيا وبالورقة والقلم.
وأضاف حمزة نمرة: أنا واحد ماشي عكس التيار، لا بيغني مواضيع شبه الرائج، ولا بيعمل موسيقى شبه الرائج، ولا بيلبس شبه الرائج، ولا بيفرض نفسه بالزنّ على الودان، وفوق ده كله انطوائي وما بيعرفش يخلق علاقات ومعارف في مجاله، بالورقة والقلم وقوانين الطبيعة، المفروض يبقى بالكتير على هامش الفن ويبقى مسموع في دوائر ضيقة جدا، لكن إن اللي بأقدمه ينتشر بالشكل ده، وإن ألبوماتي تنزل في موسم الصيف فتنافس فئات البوب، وتبقى رائجة في كل المنصات، فده فضل من ربنا كبير أوي، ده مش حقي ده أكتر من حقي بمراحل، فالحمد لله رب العالمين.
وواصل حمزة نمرة: بشكركم إنكم كنتم سبب في النجاح ده، كل واحد سمعني واتأثر، اتكلم عني وسط صحابه، نشر أغنية ليا، حضر لي حفلة، ربنا جعلكم سبب في إن فني يفضل عايش، وسامحوني على أي تقصير أو حاجة كانت أقل من توقعاتكم، ده اللي ربنا يسره لي لتقديمه وربنا يرزقنا حسن النوايا، وأخيرا أشكركم من قلبي.
