مشيرة إسماعيل: عادل إمام مكنش بيسمح لحد يضايق ويهين ست.. وأنا مش رقاصة ولكني بقدم تراث بلدي
تحدثت الفنانة مشيرة إسماعيل، عن الفنان عادل إمام، مشيرةً إلى إنه لم يكن يسمح بأي مضايقات لممثلات مسرحياته، بجانب حديثها عن عملها في الفرقة القومية للفنون الشعبية.
وقالت مشيرة إسماعيل خلال ندوتها مركز إبداع بيت السحيمي: عادل إمام مكنش بيسكت لأي حد يضايق ست من ستات مسرحية الواد سيد الشغال، كان بيحترم الناس اللي معاه ومفيش حاجة اسمها حد يطلش فينا أو يهينا، كان عادل واقف ليهم هو راجل محترم.
مشيرة إسماعيل: عادل إمام أكتر حد اشتغلت معاه
وتابعت: عادل إمام أكتر واحد اشتغلت معاه واحترمته في شغله وهو بيحترم شغله جدًا، يعني برا الشغل نهزر ونسافر، ولكن جوا المسرح بيحترم الدقيقة وهو راجل محترم وأسرة محترمة، والفنانين كلهم بيحترموا مكانته، وهو أكتر واحد أثر عليا.
مشيرة إسماعيل تتحدث عن عملها بالفرقة القومية للفنون الشعبية
أما عن عملها بالفرقة القومية للفنون الشعبية، فعلقت مشيرة إسماعيل: ليا وجهة نظر معرفش عادية ولا إيه، أنا مش رقاصة أنا فنانة بقدم تراث بلدي، الفرق الأجنبية والعالم كله بينبهر بـ تراث بلدنا، إحنا مش فرقة رقص إحنا بنقدم تراث مصر، فرق الرقص الشعبي مش رقاصين إحنا لينا رسالة توصيل تراث مصر في العالم، ناس محترمة بتعمل ملابس وناس محترمة بتعلمنا.
