رشحني لمسلسل وقالي أنا مصيطك.. معتز حسام يروي موقفًا مؤثرا جمعه بالراحل تيمور تيمور
كشف المخرج معتز حسام عن موقف جمع بينه وبين الراحل مدير التصوير تيمور تيمور، الذي رحل عن عالمنا خلال الساعات الأخيرة، بعد أن توفي غريقًا بـ رأس الحكمة في الساحل الشمالي خلال محاولته إنقاذ نجله من الغرق.
وكتب معتز حسام عبر حسابه الشخصي بموقع التواصل الاجتماعي فيسبوك: كنا بنعمل مسلسل خلصانة بشياكة وأنا كنت مساعد أول وكان عندنا أوردر في الحزام الأخضر صعب جدًا وكان يوم طويل جدًا ومشيت بالعربية وفجأه لقيت الكاوتش نايم ووقفت ومش معايا استبن ومش عارف اعمل ايه.
وتابع معتز: فجأة لقيت تيمور معدي من قدامى اتكسفت حتى أشاور له، راجل مدير تصوير هقوله يعمل إيه يعني عيب، وفجأة لقيته لف ورجعلي، ونزل وفك بنفسه فردة الكاوتش وخدها في عربيته وقالي خليك أنت جنب عربيتك قولتله ياريس مش عارف أقولك إيه قالي تعرف تخرس، وراح صلح الفردة ورجع ركبها لي بنفسه.
وأضاف: مبقتش مصدق إزاي ده حصل مدير تصوير له اسمه، وبعد أوردر طويل وشاق زي ده، كان ممكن يمشي عادي وعمري ما كنت هزعل بعد المسلسل لقيته بيكلمني بنفسه بيقولي هيكلموك في مسلسل لا تطفيء الشمس واطلب الرقم اللى أنت عايزة أنا مصيتك هنا.
واختتم: وفعلا نزلت وأخدت رقم كويس أوي وقتها على حس تيمور تيمور جدعنتك يا تيمور ملهاش مثيل، راجل محترم جدع فنان كبير، مدير تصوير مهم كاميرا مان مالوش مثيل..الله يرحمك يا طيب.
