شغال عندي من 17 سنة.. أول تعليق من الليبي صاحب فيديو مزاح الأسد مع عامل مصري بليبيا | خاص
أثار مقطع فيديو متداول عبر مواقع التواصل الاجتماعي، يظهر فيه ليبي يمزح مع عامل مصري مستخدمًا أسدًا، جدلًا واسعًا، ما دفع صاحب المزرعة للخروج وتوضيح الحقيقة.
أول تعليق من الليبي صاحب فيديو مزاح الأسد مع عامل مصري في ليبيا
قال الليبي في تصريحات خاصة لـ القاهرة 24، الأسد اللي ظهر في الفيديو كان من غير مخالب أو أنياب، وكنت بهزر مع علاء زي ما بعمل دايمًا مع أصحابي.
علاء مش بس عامل عندي، ده صديقي، وشغال معايا من 17 سنة، وبيني وبينه عِشرة كبيرة ومعرفة بأهله.
وأضاف: أنا بحب جدًا أهل مصر وخاصة أهل الصعيد، لكن للأسف بعض الصفحات نشرت الفيديو بشكل مسيء وبغرض زيادة المشاهدات، وده مش الحقيقة."
وكشف الليبي أنه يمتلك مزرعة لتربية وتدريب الكلاب البوليسية والحيوانات المفترسة، مؤكدًا أنه سبق وامتلك أكثر من أسد لكنه اضطر لبيع بعضها لعدم القدرة على تدريبها، بينما احتفظ بالأسد الذي ظهر في الفيديو.
وتابع: الأسد اللي ظهر معانا كان تحت السيطرة ومكنش عنده لا أنياب ولا مخالب، والموقف كان هزار متقبل من علاء، وبعد الضجة، صورت فيديو جديد مع علاء وبجواري الأسد للتأكيد إن مفيش أي إساءة ولا إهانة، لكن الصفحات دي متعمدة تثير الجدل.
وختم حديثه بالتأكيد على عمق العلاقة بين الشعبين المصري والليبي، قائلًا: أنا بعتبر علاء زي أخويا، وأهل مصر وأهل الصعيد غاليين عليّ جدًا، وربنا يحفظ مصر وليبيا وإحنا في الآخر شعب واحد.
