اتجوزت واحد مش فاكرة اسمه كله وبصور المقاطع عشان أبقى ممثلة.. اعترافات صادمة لـ البلوجر لوليتا| خاص
كشفت التحقيقات تفاصيل جديدة في اتهام البلوجر لوليتا بنشر مقاطع فيديو عبر مواقع التواصل الاجتماعي، تتضمن ألفاظا خادشة للحياء تتنافى مع قيم المجتمع وتمثل خروجا على الآداب العامة، حيث اعتادت تصوير الفيديوهات لزيادة نسبة المشاهدات.
اعترافات صادمة لـ البلوجر لوليتا في اتهامه بنشر فيديوهات خادشة
وحصل القاهرة 24 على التحقيقات في واقعة البلوجر لوليتا، والتي حملت رقم 1970 لسنة 2025 حيث إن المتهمة ظهرت في العديد من الفيديوهات وهي ترتدي ملابس مخلة وشبه عارية، وظهرت عليها بعض التحويلات المادية.
واستمعت جهات التحقيق للمتهمة في اتهامها بنشر مقاطع فيديو بمواقع التواصل الاجتماعي، تتضمن ألفاظا خادشة للحياء تتنافى مع قيم المجتمع وتمثل خروجا على الآداب العامة، وجاءت كالتالي:
اعترافات البلوجر لوليتا
اسمي: آلاء محمد 33 سنة وحاصلة على دبلوم تجارة - بلوجر.
س: ما قولك فيما هو منسوب إليك من أنكِ متهمة بتوجيه دعوة للجمهور تتضمن لفت الأنظار إلى الدعارة والتحريض عليها، وذلك من خلال بث مقاطع مرئية يحتوي على مشاهد راقصة خادشة للحياء العام، تتضمن إيحاءات مخالفة للآداب العامة؟
ج: محصلش
س: ما قولك فيما هو منسوب إليك من أنك متهمة بإنشاء حساب إلكتروني على مواقع التواصل الاجتماعي بقصد ارتكاب الجريمة محل الاتهام السابق؟
ج: محصلش
س: ما قولك فيما هو منسوب إليك من أنك متهمة بالتعدي على المباديء والقيم الأسرية للمجتمع المصري بأن قمت بتصوير ونشر عبر حسابات الإلكترونية المتاح للعامة مطالعتها مقاطع مرئية راقصة خادشة للحياء العام وفيها دعوة للدعارة وتحريض عليها؟
ج: أيوة حصل بس أنا كنت بصور المقاطع دي عشان أبقى ممثلة.
س: ما هي ظروف نشأتك الاجتماعية؟
ج: أنا اتولدت في المنصورة ووالدي كان مهندس كمبيوتر وكان عنده شركة خاصة بيه ووالدتي ربة منزل ومعرفش مؤهلها إيه وكان عندي اخوات أصغر مني شريف محمد وهو خريج كلية تربية نوعية معرفش دفعة كام وعندي أختي وهي أختي من والدتي ووالدي ووالدتي انفصلوا وأنا صغيرة وبعد كدة كنت عايشة مع ستي في طلخا بالمنصورة وفضلت معاها لحد ما انفصلت عن جوزها وهي لسة عايشة معايا، وكانت معترضة لحد دلوقتي على الفيديوهات اللي بعملها عشان اللبس في الفيديوهات.
وما هي ظروف حياتك الاجتماعية؟
ج: أنا اتجوزت من واحد اسمه عمر، ومش فاكرة بقية اسمه وهو كان معاه دبلوم صنايع وصاحب كافيه والكلام ده كان في 2011 وقعدنا متجوزين 4 شهور، وكان بيصرف عليا واتطلقت منه لأنه ضربني بمطواة لأني شتمته لما عرفت إنه متجوز ومكنش قايلي، وأنا معنديش أولاد وعاوزة أقول إني كنت عايشة معاه في طلخا في المنصورة وبعد كدة رحت القاهرة عشان أشتغل.
س: ما هي غاية مؤهلاتك العلمية؟
ج: أنا معايا دبلوم تجارة من مدرسة درين الثانوية بالمنصورة وقبل كده كنت في مدرسة اللغات التجريبية وسيبتها لأني كنت عايزة أشتغل.
س: وإبان فترة دراستك من الذي كان ينفق عليكِ؟
ج: والدتي كانت بتصرف عليا عن طريق إنها بتعمل وجبات أكل للناس وتبيعها بس هي تعبت في سنة 2016 وجالها غضروف في ضهرها وبقيت أنا اللي يصرف على البيت من سنة 2016 عن طريق إنى كنت بشتغل في مطاعم وكافيات واتيليه وصالون حريمي وآخر حاجى كانت تيك توك في أواخر 2018 تقريبا.
س وما هي آلية العمل عبر تطبيق التيك توك كما قررت؟
ج هو تطبيق نزل على آب ستور كان اسمه ميوزكلي حملناه على الموبايل وبعدين بدأت أشتغل عليه إني أنا بنزل عليه فيديوهات رقص على أغاني وكان التطبيق ده في الأول على سبيل الهزار وبس وبعد كدة في سنة 2022 بدأت اللايفات (البث المباشر) عبارة عن مباراة للتحديات بنظهر فيها أنا وخصمي في بث مباشر وكل واحد فينا بياخد دعم من الناس اللي بتحبه على حسب الرمز وفي النهاية اللي بيكسب ممكن يحكم على الخسران إنه ينفذ أي طلب ليه زي أكل شطة وخلافه ولو فيه حد نزل دعم مثلا في دعم الأسد ده بيترجم لفلوس بتجيلي عن طريق الداعم بمبلغ 135 دولار عن طريق تطبيق كاش ومكنتش أعرف إنها غلط ولما عرفت إن فيها مشاكل حذفتها من الحساب
س: وما هي مصادر دخلك؟
ج: من الإعلانات التي بعملها على التيك توك.
س: وما هو مضمون تلك الإعلانات؟
ج - هي إعلانات دعاية المطاعم أو ميكب أرتست أو ملابس أو إكسوارات.
س وما هو مقدار الدخل اليومي العائد من تلك الإعلانات؟
ج: أنا ممكن يجيبلي إعلان في الشهر أو كل شهرين أو 3 أو 4 أيام ورا بعض بس في الإعلان الواحد ممكن أخذ حوالي 8 الآف جنيه لو المعلن ماركة معروفة ولو مش معروفة بيبقى المبلغ أقل، وممكن آخد مقابل الإعلانات هدوم أو أكل في مطعم.
س: وما هي آلية اتفاقك مع المعلنين؟
ج: اللي عايز يعلن بيبعتلي على انستجرام أو التيك توك وبيحولي على تطبيق كاش
س: وما مدى خضوع ذلك النشاط للضرائب؟
ج: أنا أصلا مديونة وعليا وصولات أمانة عشان قسط العربية وعشان أخويا كان عايز يعمل عملية
س: وما هو مقدار دخلك اليومي؟
ج: أنا مقدرش أحدد بس عايزة أقول إن التيك توك بيبقى متحدد عليه أنا دخلي إيه وصرفت قد إيه
س: وما هي مصادر إنفاقك؟
ج: أنا بصرف على والدتي واخواتي وبسدد أقساط عليا إيجار شقة وقسط عربية وقسط فلوس العملية الجراحية لأخويا
س: وأين تلك الوحدة التي استأجرتيها؟
ج: أنا مأجرة الشقة بـ15 ألف جنيه في الشهر
وقررت جهات التحقيق المختصة، إحالة البلوجر لوليتا إلى المحاكمة في اتهامها بنشر مقاطع فيديو بمواقع التواصل الاجتماعي، تتضمن ألفاظا خادشة للحياء تتنافى مع قيم المجتمع وتمثل خروجا على الآداب العامة، وتحديد جلسة 13 سبتمبر لمحاكمتها.
