هاجر الشرنوبي: بيعت آيس كريم علشان أدفع مصاريف مدرسة ابني.. وأبويا مات على إيدي
كشفت الفنانة هاجر الشرنوبي كواليس لأول مرة عن عملها في بيع الأيس كريم، بسبب مصروفات مدرسة نجلها.
قالت هاجر الشرنوبي، في تصريحات تليفزيونية: كنت عايزة أدفع مصاريف مدرسة ابني، ووقتها مكنتش بشتغل خالص ولا بمثل، كنت قاعدة في إسكندرية.
واستكملت: اشتغلت أبيع آيس كريم عشان أدفع مصاريف المدرسة، والحمدلله كانت خطوة فارقة جدًا في حياتي، فجأة لقيت نفسي قدام مسؤولية حتى لو كنت متدلعة، المدرسة في شهر 9 وإحنا خلاص في شهر مثلًا 4 فهعمل إيه؟ طب إيه الشغل؟.
وأضافت هاجر الشرنوبي: رُحت بقى أبيع آيس كريم، كانت فترة مرهقة ونقطة تحول في حياتي، ما كنتش الأول بعرف أتعامل، بعد كده خلاص بقيت أتعامل وبقت فترة بجد فارقة جدًا في حياتي.
هاجر الشرنوبي تتحدث عن والدها الراحل
وتحدثت عن والدها الراحل ونصائحه لها، قائلة: أنا كنت شخصية عصبية جدًا وعشان كده في أي مشكلة كان دايمًا يقولي براحة هتكبري المشكلة هتلاقيها كبرت معاكي، هتصغريها هتحتويها، وهو فعلا كان بسيط عقله كبير وحكيم وبعدها أي مشكلة أقابلها في حياتي أشوفها صغيرة جدًا حتى لو خدت سنين أو وقت طويل.
واختتمت هاجر الشرنوبي قائلة: قطعًا أصعب لحظة في حياتي كانت يوم وفاة بابا، لأنه مات على إيدي.
