الإعلامية هند مدحت تعلن ارتداء الحجاب: بحب ربنا أكتر.. وبدعوات أمي وأبويا اتحجبت
أعلنت الإعلامية هند مدحت، ارتداء الحجاب رسميا، في خطوة وصفتها بـ بداية لحياة جديدة، مؤكدة أنها جاءت بعد رحلة طويلة من التفكير والصراع الداخلي، ودعوات الأهل والمحبين.
المذيعة هند مدحت تعلن ارتداء الحجاب
وكشفت هند عن القرار من خلال منشور مؤثر عبر حسابها الرسمي على موقع إنستجرام، قالت فيه: عمري ما غلبت في الكلام، ولا اتحطيت في موقف وكنت مش عارفة أقول إيه، بس أنا فعلا مش عارفة أكتب حاجة ولا أقول حاجة، مكنش عندي شك إن اللحظة دي هتيجي تاني.. كنت واثقة في ربنا إنه عارف اللي جوايا، عارف أنا بحبه قد إيه، ومش بتبسط في أي مرة بعصيه فيها، سواء في الكبائر أو الصغائر.
وأضافت هند مدحت، أنها كانت تفكر في ارتداء الحجاب منذ أربع سنوات، لكنها لم تكن قادرة على اتخاذ الخطوة رغم رغبتها الشديدة في ذلك، مشيرة إلى تعلقها بمظاهر الحياة مثل الشعر، البحر، الفساتين، السهر والموسيقى، لكنها في النهاية اختارت ما يرضي الله.
وتابعت: أنا بقالي 4 سنين مصدعة صحابي: أنا عايزة أتحجب.. مش قادرة بس عايزة. بحب شعري أوي.. بحب البحر والتان، الفساتين القصيرة، الحفلات والسهر، المزيكا، ونظرات الإعجاب في عيون الناس. بحب شغلي اللي يمكن الحجاب يغيره.. أو يخليني مقدرش أعمله تاني. بس بحب ربنا أكتر.
وأشارت المذيعة الشابة إلى أن قرارها جاء تزامنا مع يوم ميلادها، واعتبرته ميلادا لحياة جديدة، بدأت ملامحها قبل عام، واشتدت عزيمتها فيها خلال الأشهر الستة الأخيرة.
واختتمت هند مدحت منشورها قائلة: أنا اتحجبت بدعوات أمي وأبويا وأخواتي، ودعوات كل بنت شافتني بطرحة في العمرة ودعتلي، فعايزاكم تكملوا دعا ليا، بس المرة دي بالثبات، ربنا بس اللي عارف القرار ده خد مني قد إيه، بس أنا دلوقتي مرتاحة ومطمنة، وعارفة وواثقة إنه هيساعدني. ادعولي كتير.. بالثبات، وإن ربنا يقدرني وألبسه بالطريقة الصحيحة اللي ترضيه.
يذكر أن هند مدحت حذفت معظم صورها السابقة من حساباتها على مواقع التواصل الاجتماعي، في خطوة لاقت دعما كبيرا من جمهورها وزملائها في الوسط الإعلامي.
