قبل بدء محاكمتها.. ننشر الأقوال الكاملة لسارة خليفة في قضية المخدرات الكبرى| تحقيقات
تبدأ محكمة جنايات القاهرة، المنعقدة بالتجمع الخامس، بعد قليل، أولى جلسات محاكمة المنتجة سارة خليفة و28 متهمًا، لمعاقبتهم عما نُسب إليهم من اتهامات بتشكيل عصابة إجرامية منظمة تخصصت في جلب المواد المستخدمة في صناعة المواد المخدرة، بغرض تصنيعها بقصد الإتجار، وإحراز وحيازة أسلحة نارية وذخائر بغير ترخيص، وينشر القاهرة 24 الاعترافات الكاملة للمتهمة سارة خليفة.
الأقوال الكاملة لسارة خليفة في قضية المخدرات الكبرى
استمعت جهات التحقيق إلى المتهمة سارة خليفة في اتهامها وآخرين معلومين بتشكيل عصابة والانضمام إليها، غرضها جلب المواد المخدرة داخل جمهورية مصر العربية بالمخالفة لأحكام القانون، بقصد الإتجار فيها.
س: ما قولك فيما هو منسوب إليك من كونكِ متهمة وآخرين بتشكيل عصابة والانضمام إليها غرضها جلب المواد المخدرة داخل جمهورية مصر العربية بالمخالفة لأحكام القانون؟
ج: محصلش أنا معرفش حاجة عن الكلام ده؟.
س: ما قولك فيما هو منسوب إليكِ من كونكِ متهمة وآخرين معلومين بتشكيل عصابة والانضمام إليها بغرض تصنيع المواد المخدرة، وهي المضبوطات السابق عرضها عليك بقصد الإتجار فيها على النحو المبين بالأوراق؟
ج: محصلش أنا معرفش حاجة عن الكلام ده؟.
س: ما قولك فيما هو منسوب إليك من أنك متهمة وآخرين معلومين بتشكيل عصابة والانضمام إليها بغرض الإتجار في المواد المخدرة على النحو المبين بالأوراق؟
ج: محصلش أنا معرفش حاجة عن الكلام ده؟.
س: ما قولك فيما هو منسوب إليكِ من إحراز وحيازة جواهر مخدرة بقصد الإتجار وفي غير الأحوال المصرح بها قانونا على النحو المبين بالأوراق؟
ج: محصلش أنا معرفش حاجة عن الكلام ده؟.
س: ما الذي حدث وما هي ظروف ضبطك وعرضك علينا؟
ج: الساعة 10 بالليل، كلمتني أم فتحي وقالتلي سيبي البيت عشان بيدوروا عليكي وبيدوروا على خالد أبو فتحي، وأكيد هيجولك عشان يسألوا على أبو فتحي، وأنا قولتلها أنا همشي وأسيب البيت ليه؟ أنا مالي ومالكو!! ولو أنتو خايفين أنا مش خايفة لأني ما بعملش حاجة غلط وقالتلي إنتي مش بتعرفي تسافري الإمارات قولتلها أيوة، أنا معايا إقامة ذهبية في الإمارات بس أنا مش همشي وأسيب البيت وقولتلها لو أنتو شايفين إنكوا عملتوا حاجة غلط، أنا شايفة إني معملتش حاجة غلط.
س: متى وأين تم ضبطك؟
ج: اتقبض عليا يوم الخميس الساعة 12 ظهرا.
س: وما هي تفصيلات نشأتك؟
ج: عندي أخ وأخت ووالدي حاليا بالمعاش ومامتي طول عمرها شغالة في مستشفى، ودلوقي شغالة في عيادة خاصة، وأنا طفلة كنت عايشة مع أمي وأبويا في النزهة وبعدين عشنا في العبور أيام الكلية، وبعدين رحنا عشنا في مدينتي وأنا عندي 20 أو21 سنة وكنا عايشين في بيت واحد أنا وأختي وأخويا وأبويا وأمي، واتجوزت في 2015 واتطلقت في 2017، ومن ساعتها وأنا عايشة مع بابا وماما في البيت.
س: وما هي حالتك الاجتماعية إذًا؟
ج: اتجوزت مرة واحدة وماتجوزتش تاني وحاليا مطلقة.
س: وما سبب طلاقك لتلك الزيجة السابقة؟
ج: جوزي كان لاعب كرة ولما سافر برة مصر حياتنا بقت مش مستقرة.
س: وهل أنجبتِ أطفال؟
ج: لا.
س: وما هي مراحلك التعليمية المختلفة؟
ج: دخلت الابتدائية في مدرسة وبعدها روحت مدرسة الأورمان وأخدت الإعدادية وفي ثانوية عامة أخدتها من مدرسة حكومية كانت عند شغل مامتي في السلام، وبعدين دخلت كلية حقوق واتخرجت في 2008 وأخذت بكالوريوس إعلام من الأكاديمية الدولية للإعلام، وكنت بشتغل هناك مذيعة وبدرس في نفس الوقت وأخذت بكالوريوس الإعلام قبل ما أتجوز بحوالي 3 سنين.
س: وما هي الوظائف التي شغلتها خلال فترة حياتك؟
ج: وأنا عندي 13 سنة كنت بعمل برنامج أطفال في إحدى القنوات، وفضلت شغالة في القناة دي في مصر مذيعة في برامج مختلفة وكانت كلها برامج منوعات، لحد ما دخلت الكلية وخلال دراستي في الكلية اشتغلت مذيعة في قناة أخرى قدمت فيها برامج كثير وكان نوعية البرامج إننا بنغطي أحداث افتتاح الأفلام والمسلسلات ودار الأوبرا.
وبعدها اشتغلت في قناة المحور وكنت بقدم فيها برنامج وكان طبيعة شغلي بنزل أعمل مقابلات مع المتهمين وفضلت في البرنامج ده حوالي 4 سنين، وبعد البرنامج ده قررت أفتح عيادة وفي مرحلة من حياتي قبل ما أفتح العيادة كنت شغالة في دبي بعمل إعلانات على السوشيال ميديا، وكان فيه شركة إعلانات ماضية معايا كنت بعمل دعاية للفنادق وكنت باخد من الفنادق دي نسبة من النزلاء اللي بيجوا كل شهر، وأي حاجة بشكل عام بعمل لها دعاية، وآخر شغل ليا إني فتحت عيادة تجميل في 2019 بس العيادة مش مرخصة باسمي وهي باسم شريكي الدكتور أ. ر.
ووقت كورونا سافرت دبي وعملت شركة في دبي في 2021 أو 2022 اسمها سارة برودكشن وعمل الشركة هو تنظيم الحفلات للمطربين وآخر حاجة بجانب شغلي عملت برنامج اسمه سارة وبيكا في قناة اسمها هي، وفي العموم أنا في الغالب كل سنة بعمل برنامج بجانب شغلي وبسافر دولة خليجية بعمل إعلانات هناك.
س: ما هو مقدار دخلك الشهري؟
ج: ممكن يوصل لنصف مليون جنيه شهريًا.
س: ما هي مصادر دخلك تحديدا؟
ج: عبارة عن تعاقدات للحفلات وتعاقدات الإعلانات وشراكة العيادة.
س: ماذا بشأن الشركة الخاصة بك المنشأة بدولة الإمارات؟
ج: طبعا دي أكبر مصدر دخل بالنسبة ليا.
س: وما مقدار أرباح تلك الشركة تحديدا سنويا أو شهريا؟
ج: أنا بكسب في الحفلة الواحدة من 30 إلى 50 ألف دولار، وبعمل في السنة حوالي بين 12 إلى 15 حفلة تقريبا.
س: وهل من مصادر دخل أخرى خاصة بك؟
ج: أنا بحب أتاجر في الذهب وأي فلوس تيجيلي أشتري بيها سبيكة وبعدين لما تكسب أبيعها.
س وما هي أملاكك تحديدا؟
ج: عندي شقة في التجمع وناسية عنوانها لأني لسة ما استلمتهاش ولسة مبقتش باسمي، وحاليا معنديش حاجة باسمي.
س: وما سبب التعاقد على الشقة المملوكة لكِ لآخر مجهول؟
ج: هو التعاقد مش باسم حد ثاني هو إبراهيم ده كان شاري الشقة وأنا اشتريتها منه.
س: ماهي بيانات حساباتك البنكية؟
ج: عندي حساب بالدولار وحساب بالمصري وعندي حساب توفير عادي.
وشرع رجال التحقيق في مواجهة سارة خليفة بالمقاطع المضبوطة على هاتفها المحمول، وجاءت التحقيقات كالآتي:
رجل التحقيق: ما صلتك بالمقاطع السابق عرضها عليك وبما تعللي وجودها على هاتفك المحمول؟
سارة خليفة: المقاطع دي في بيتي وصوت الأنثى اللي ظاهر في المقطع الثاني ده صوتي.
رجل التحقيق: ماهي تفصيلات تلك الواقعة تحديدا؟
سارة خليفة: الراجل ده اسمه م. ش، وكان شغال سواق على عربيتي وبعد كده سابني وراح اشتغل مع “ف” هو وأخوه، وحصلت ما بين م وفي خلافات عبارة عن أن م وأخوه اتفقوا مع بعض يروحوا يرشدوا عن ف، وم أخد من واحد 500 ألف جنيه واتفق هو وأخوه يطلعوا يسرقوا فلوس من بيت ف، وبكده يبقوا أخدوا فلوس من الاثنين ويقولوا إن الناس اللي طلعت شقة ف، عشان يقبضوا عليه هما اللي سرقوا الفلوس والمكالمة دي كانت متسجلة بين أخو م وبين زمايله اللي هيطلعوا يمسكوا ف.
وأضافت سارة خليفة في التحقيقات: وبالنسبة للواقعة اللي تخصني أنا في البيت عندي إن مسعد كان معاه مفتاح البيت بتاعي وعدى سأل البواب بتاعنا قاله أستاذة سارة خليفة فين النهاردة، وأنا مكنتش موجودة مسافرة الإسكندرية ومش فاكرة الموضوع ده كان إمتى وتقريبا قبل تاريخ الفيديو ده بيومين، وأنا رجعت البيت من السفر وفي يوم وأنا في البيت لقيت باب الشقة بيتفتح وأنا استخبيت ورا الستارة وبصيت من ورا الستارة عشان أشوف كام واحد لقيته م بس، ولما طلعتله لقيته بيقولي أستاذة سارة خليفة أنا مش جاي أسرق فلوس أنا جاي آخد الرخصة بتاعتي قولتله أنا هلم عليك الجيران دلوقتي وكنت هتصل بالنجدة قالي أبوس إيدك ما تحبسينيش أنا راجل غلبان وبتوع الأمن طلعوا وقالولي خلاص سامحيه فسألته معاك مفتاح البيت ليه لغاية دلوقتي قالي حضرتك كنتي سايبة نسخة منه ونسيتي تطلبيها مني وهو كان واقف معاه اتنين صحابه عشان ياخدوه بالعربية وهما كلموا ف، وقالوله إن أنا هبلغ الشرطة دلوقتي راح بعت التانيين جم اتخانقوا معاه وحصلت المشكلة دي في بيتي.
رجل التحقيق: متى وأين حدثت تلك الواقعة؟
سارة خليفة: حصلت في تاريخ الفيديو ومش فاكرة امتى وحصلت في البيت عندي في العجوزة.
رجل التحقيق: وما صلتك بالمدعو م ش تحديدا؟
سارة خليفة: هو كان سواق عندي وبعدها سابني وراح اشتغل مع ف.
رجل التحقيق: ما هي بيانات المدعو م ش تحديدا؟
سارة خليفة: أنا معرفش غير اسمه الثاني ومش معايا بيانات تانية.
رجل التحقيق: ما سبب تواجده بمحل سكنك تحديدا وبين حدوث تلك الواقعة؟.
سارة خليفة: أنا كنت قاعدة لوحدي في البيت ولقيت باب الشقة بيتفتح واستخبيت ورا الستارة وبصيت عشان أشوف مين اللي داخل لقيته م.
رجل التحقيق: ما مضمون الحوار الذي دار بينكما حينها؟
سارة خليفة: هو قالي أنا مش جاي أسرق فلوس أنا جاي آخد بطاقتي ورخصتي.
رجل التحقيق: ما التصرف الذي بدر منك حال دلوفه إلى مسكنك حينها؟
سارة خليفة: أنا بلغت الجيران والأمن وفعلا اتلموا وكنت عاوزة أبلغ النجدة.
رجل التحقيق: ما الذي حال دون إبلاغك الشرطة حينها؟
سارة خليفة: لأن م كان معاه اتنين تحت العمارة عشان يجروا بيه بعد ما يسرق الشقة ولما الناس اتلمت الاثنين اللي مع م كلموا ف وقالوله إني عاوزة أبلغ الشرطة على م وأحبسه.
رجل التحقيق: ما التصرف الذي بدر من المتهم ف.خ.ف حيال ما تم إخباره به من هذين الشخصين؟
سارة خليفة: هو بعت اللي عندي في البيت عشان يتخانقوا مع م وحصلت المشكلة اللي في الفيديو في البيت عندي.
رجل التحقيق: ما هي بيانات الشخصين اللذين حضرا لمسكنك بأمر المتهم ف خ ف؟
سارة خليفة: أنا معرفهمش.
رجل التحقيق: هل سمحت لهما بالدخول إلى مسكنك والاستقرار بداخله؟
سارة خليفة: أنا مدخلتهمش الباب كان مفتوح لأن كان فيه خناقة.
رجل التحقيق: ما قولك حيث إن مقطع الفيديو محل واقعة التعدي على المدعو مسعد شعبان يظهر به هذان الشخصين يقومان بارتكاب الأفعال المادية لواقعة التعدي؟.
سارة خليفة: لما الاثنين دول جم قالولي إحنا هناخد مسعد ونتكلم معاه في الأوضة وسألت مسعد تعرفهم قالي أيوه أعرفهم.
رجل التحقيق: هل اصطحب سالفي الذكر المدعو م ش إلى الغرفة حينها؟
سارة خليفة: أيوه
رجل التحقيق: ما الأحداث التي دارت داخل تلك الغرفة حينها تحديدا؟
سارة خليفة: أول ما سمعت زعيق وضرب في الأوضة فتحت عليهم الأوضة ومشيتهم وقولتلهم اطلعوا برة اضربوه تحت إنتوا هتودوني في داهية وأنا مليش دعوة.
رجل التحقيق: هل استجاب المجهولين لذلك؟
سارة خليفة: أول ما قولتلهم هبلغ النجدة خرجوا من البيت.
رجل التحقيق: إنتي متهمة وآخرين مجهولين بحجز المجني عليه المدعو م ش دون أمر أحد الحكام وكان ذلك مصحوبا بتعديات بدنية على النحو المبين بالأوراق.
سارة خليفة: أنا معملتش حاجة وهو اللي جم عليا في بيتي.
رجل التحقيق: إنتي متهمة وآخرين مجهولين بهتك عرض المجني عليه المدعو م ش بأن جردتيه والمجهولين من ملابسه واعتديتم عليه اعتداءات جنسية وإحداث إصابته عمدًا وتصويره عاريا.
سارة خليفة: أنا معملتش حاجة وهو اللي اتهجم عليا في بيتي
رجل التحقيق: هل لديك أقوال أخرى؟
سارة خليفة: لا.
