فرحت إنه من بلدي.. أول تعليق لـ الممرضة المصرية بالكويت بعد إنقاذها مُسنًا من أزمة قلبية
تصدر فيديو لممرضة مصرية بالكويت تريند منصات التواصل الاجتماعي خلال الساعات القليلة الماضية، بعد إنقاذها مسنًا في أحد المولات التجارية، حيث توقف نبضه بشكل مفاجئ، لكنها ساعدته على الإفاقة من خلال تمارين الإنعاش الرئوي.
أول تعليق من الممرضة المصرية بالكويت بعد إنقاذ مسن
وقالت صفاء رحمو، الممرضة المصرية في تصريحات خاصة لـ القاهرة 24: أنا ممرضة خريجة جامعة عين شمس، وفي الوقت ده كنت مع ابني الصغير في مول بالكويت بنشتري حاجات مع بعض، وتفاجئت بصوت ناس بتصرخ افتكرت حد مات، وبيقولوا إنا لله وإن إليه راجعون قلت إن فيه شخص مات.
وتابعت: طلعت لقيت مسن مرمي ع الأرض والنبض مكنش موجود خالص وكانت كل أعضاءه متوقفة تقريبا، لجأت للإنعاش القلبي الرئوي عملت 30 نبضة لكنه مفاقش وعملت 30 نبضة تاني لقيته فاق الحمد لله، والناس مكنتش متخيلة
عدلته على جنبه وقولت للناس محدش ييجي ناحيته، وطلع إنه بيعاني من مشكلة في القلب وده بسببها والحمد لله إنها جت على قد كده.
وتابعت: لما المسن فاق سألته عن جنسيته قالي إنه مصري وفرحت جدا به، ومتوقعتش خالص الفيديو ينتشر أو ينزل على السوشيال ميدياـ وردود فعل الناس فرحتني أوي ومش متخيله إن الفيديو وصل المشاهدات دي كلها والناس دعتلي.
