بعد سخرية سلوم حداد من الفنانين المصريين.. الفنانة السورية سُلاف فواخرجي: مصر لا تُهان ومينفعش ننكر فضلها |خاص
علقت الفنانة السورية سُلاف فواخرجي، على سخرية الفنان السوري سلوم حداد وانتقاده لنطق الفنانين المصريين للغة العربية، مشيرةً إلى أن مصر دائمًا لها الريادة في الفن العربي.
وقالت سُلاف فواخرجي خلال تصريحاتها لـ القاهرة 24: مصر مش بتتهان، سلوم فنان كبير وإحنا كـ سوريين بنعتز بيه، هو أخفق في رأيه وأساء التعبير لأنه إحنا العرب، عرفنا الدراما والمسلسلات من مصر، وكلنا لما اتعرفنا على الفن عرفناه من المصريين والمسلسلات القديمة والتاريخية المصرية.
وتابعت سُلاف فواخرجي: الكلام اللي قاله سلوم مش صحيح وأكيد هو أخفق وأساء التعبير وأنا لا أقبل الكلام ده خالص، ومش هسمح إن حد يتعدى على الفن المصري.
وأضافت سُلاف فواخرجي: أي حد ينكر الريادة المصرية ده يبقى ناكر ومش فاهم، الفن والمسلسلات والأغاني المصرية، أغاني أم كلثوم وهي بتغني بالفصحى، كل ده بيثبت إن الفنانين المصريين لهم الريادة في ده.
وأردفت سُلاف فواخرجي: ميصحش السوريين لما ينجحوا في حتة التاريخ مينفعش يتغروا ويبطلوا يشوفوا المصريين، لا شك إنه فنان مهم وده مش مقياس، مصر مش بتتهان ولكن اللي بيحاول يهينها بيكون بيهين نفسه.
سلوم حداد يسخر من الفنانين المصريين
وأثار سلوم حداد جدلًا واسعًا بسبب ما قاله خلال مقطع فيديو متداول له عبر موقع X: الممثلين المصريين عندهم مشكلة في التحدث وإجادة اللغة العربية.. قلّة اللي كانوا يجيدون اللغة زي الراحل نور الشريف وعبد الله غيث.
