اشتغلت بعد وفاة زوجي وأولادي شجعوني.. أول تعليق لـ كابتن فاتن سائقة بعمر 65 تكسر الصورة النمطية للنساء
شاركت سيدة منشورًا عبر منصات التواصل الاجتماعي، أشادت به بسائقة أحد تطبيقات النقل الذكي المخصصة للسفر عبر المحافظات، وتبلغ كابتن فاتن سائقة النقل الذكي 65 عاما، وقيادتها متزنة وهادئة، وتتمتع بثقة كبيرة تكسر الصورة النمطية السائدة لقيادة النساء.
أول تعليق لـ كابتن فاتن سائقة بعمر 65 تكسر الصورة النمطية للنساء
وقالت كابتن فاتن عمر في تصريحات خاصة لـ القاهرة: زوجي توفي من سنة ونص وبدأت وقتها اشتغل على عربيتي، أنا في السن الـ 65 بس الحمد لله بقدر اشتغل واروح واجي.
وتابعت: نزلت اشتغل على تطبيق نقل ذكي من التطبيقات الموجودة دلوقتي وناس كتيير بتشتغل عليها وعلى عربيتي، وطبعا زي أي حد بتقابلني تحديات ومخاوف كتير كل يوم بس بفضل ربنا بتغلب عليها.
وأضافت: في ناس كتيير بتخاف تركب معايا عشان ست بس بيغيروا فكرتهم بعد ما يجربوا ويحجزوا رحلة معايا، ولادي وعيلتي شجعوني اني اشتغل في السن ده والشغل مش عيب ولا حرام، وواخدة الشغل ده تجربة جديدة ليا بضيع وقت وبتسلى والناس كلها بتحبني.
وشاركت سيدة منشور لها عبر فيسبوك عن تجربتها الأولى مع كابتن سيدة حيث كتبت: طلبت رحلة من أحد تطبيقات النقل الذكي، جالي عرض من الست الجميلة دي بصراحة قلقت وقولت لنفسي هتسافري إسكندرية وست سايقة بيكي وإنتي عارفة سواقة الستات، وكمان لقيت سنها مكتوب 65، قلت ده يا صباح الشلل المروري، لكن تفاجأت أنها ست جميلة جدا وواثقة من نفسها وشاطرة ودمها خفيف ومتزنة جدا في القيادة.
