أحمد السقا يدافع عن محمد رمضان: صديقي ومعرفش ليه الناس بتهاجمه
دافع الفنان أحمد السقا عن زميله الفنان محمد رمضان، في ظل الهجوم الذي يتعرض له الأخير على مدار سنوات بسبب تصريحاته المتكررة حول كونه نمبر وان.
أحمد السقا يدافع عن محمد رمضان
وقال السقا في تصريحات خاصة لـ القاهرة 24: لو محمد رمضان بيقول إنه رقم واحد.. فهو ده شعاره، ودي شخصية هو اختار يقدمها. ولما عمل حركة نمبر وان مغلطش، ومش فاهم ليه الناس بتهاجمه على ده.
وأكد السقا أن الفنان طالما حوله جدل، فذلك يعني أنه حاضر ومؤثر، مضيفا: رمضان رجل مشع، وموجود، والناس بتتكلم عنه. وأنا ومحمد أصدقاء من زمان، واللي ميعرفش لازم يعرف إن بينا تاريخ طويل. وبرد غيبته، وبقول إن أكيد مش هو اللي قال على نفسه نمبر وان، ده الجمهور هو اللي قال كده.
تحدث أحمد السقا عن فلسفته الفنية في التعامل مع النجاح والفشل، مؤكدا أن التوفيق من عند الله، وأن العمل الجيد قد لا يحقق دائما النجاح الجماهيري المتوقع.
وختم حديثه قائلا: الأفضلية لله سبحانه وتعالى.. ممكن أعمل عمل ماينجحش، لكن ده مش فشل مني، لأن عندي رصيد فني يسمح ليا بالتجربة والمجازفة. وأي فنان عنده تفاوت، ده طبيعي، مش فشل ذريع، لكن توفيق واجتهاد.
أحمد السقا: الزعيم والهضبة والعميد مثلي الأعلي
وعند سؤاله عن مثله الأعلى، أجاب السقا بثلاثة أسماء يرى أنهم يمثلونه على المستويين الفني والإنساني: دائما لما حد بيسألني مين مثلي الأعلى، بقول: عمرو دياب، الزعيم عادل إمام، والكابتن حسام حسن.. لأن التلاتة دول فايتر، وأنا بحب الناس اللي بتقاتل وبتشتغل على نفسها، وأنا زيهم.
وأوضح السقا أن ما يجمع بين الثلاثة هو الإصرار والاستمرارية، وهي صفات يعتبرها أساسية في أي مسيرة ناجحة سواء في الفن أو الرياضة.
وتطرق السقا خلال حديثه إلى علاقته بالفنانة شيرين عبد الوهاب، مؤكدا أنها كانت دائما قريبة منه، خاصة في أوقات الشدة، حيث قال: شيرين عشرة عمر، ومن أكتر الناس اللي كانوا معايا لما كنت في المستشفى، وقعدت معايا وقت طويل. هي مش محتاجة نصيحة، بس محتاجة حد يكون أمين عليها.
وأبدى السقا انزعاجه من الانتقادات المتكررة التي تتعرض لها، مطالبا باحترام الفنانين الكبار والحفاظ عليهم، مؤكدا: عندنا فنانين لازم نحافظ عليهم، زي شيرين، وأنغام، وآمال ماهر.. دول قيمة كبيرة.
