خروج زوج ميار الببلاوي من المستشفى بعد استقرار حالته الصحية
كشفت الفنانة ميار الببلاوي، مستجدات الحالة الصحية لزوجها بعد تعرضه لوعكة صحية خلال الأيام القليلة الماضية، وخضوعه لعملية بالقلب عقب إصابته بجلطة خلال توجهه للمملكة العربية السعودية.
وقالت ميار الببلاوي، في تصريح خاص لـ القاهرة 24: جوزي حالته الصحية بقت زي الفل الحمد لله، خرج من المستشفى في السعودية ورجع مصر وامبارح خرجنا اتعشينا برا، شكرًا على اهتمامكم ودعاء الناس.
تفاصيل الحالة الصحية لزوج ميار الببلاوي
وسبق وكشفت ميار الببلاوي، عن الحالة الصحية لزوجها، حيث قالت في تصريح خاص لـ القاهرة 24: جوزي كان مسافر السعودية ودي بلده بيسافر هناك على طول، وأنا كان قلبي مقبوض وقولتله متسافرش أنا مش مطمنة، رجعت من البرنامج كان عندي صداع خدت علاج ونمت، صحيت لقيت مدير أعماله بيكلمني وقالي إن جوزي تعب في الطائرة وراح العيادة في المطار وبعدها اتنقل المستشفى وعنده جلطة، دي الجلطة رقم 3 هو كان مركب دعامات مرتين قبل كده، الجلطة للمرة الثالثة خطر جدًا، ادعوا له يرجع بالسلامة.
وواصلت ميار الببلاوي: أنا هموت علشانه ومش عارفة أسافر له لسه ورقي مخلصش، لو كان هنا كنت بقيت تحت رجليه، ولكن هو بعيد عني ومش عارفة أعمل إيه وهموت علشانه، من يوم فرح ابني مشوفتش يوم كويس، مشاكل وجوزي وقع مننا، ربنا يستر ويعديها على خير.
