كريم سرور لـ المُعتدين على المخرج محمود يحيى أمام سينما زاوية: احتكرتوا الشغلانة.. ويجب التحقيق معهم لأنهم غير داعمين للفن المستقل
أعرب المؤلف كريم سرور عن استيائه الشديد بسبب الفعل الذي حدث مع المخرج الشاب محمود يحيى، بعد رفض سينما زاويا عرض فيلمه الأول اختيار مريم والتعدي عليه بسبب اعتصامه، مُشيرًا إلى أن إدارة السينما غير داعمين للفن المستقل من ذلك التصرف.
وكتب كريم سرور عبر حسابه الشخصي بـ فيسبوك قائلًا: هو إنتوا اتولدتوا مخرجين ومنتجين يعنى وأساتذة كبار.. مانتو جربتوا وحاولتوا كتير وأكيد كان عندكم كدة فى بداية مشواركم وحمقة وعصبية البدايات.
وتابع كريم سرور: أكيد مكنتوش هتبقوا مبسوطين لما تتهانوا وتضربوا، إيه اللى بتعملوه ده يا رواد الفن المستقل ياللى حاملين الشعلة، بتبرروا ضرب فنان عشان مبتدئ.
وأردف: إنتوا مين طب خلاص سهلة نقاطع سينما زاوية لحد ما يعرضوا الفيلم بتاع الأستاذ محمود يحيى اللى أقسم بالله ما اعرفه شخصيًا ولا عمرى سمعت عنه ولا أعرف ده فيلم ايه أنا كل اللى شوفته إن فيه فنان مسالم واقف بـ بوستر فيلم جنب سينما زاوية وطلعوا عليه العاملين فى السينما ضربوه ومشوه بشكل مهين جدًا بدل ما تتصلوا بيه وتحتووا الموضوع وتفهموا سبب المشكلة بما إنكم الكبار يعنى
وتابع: لأ ده إنتم بتعلنوا بكل بساطة عندكم إن اللى حصل فى الفنان ده هو السبب فيه وبتسخروا منه كمان.. والله ما مصدق إحتكرتوا الشغلانة والتنظير فيها وبتحكموا على اللى يفتح بوقه إنه بلطجى.. أنا شايف إنه يتم التحقيق مع سينما زاوية وإدارتها وياريت تتقفل خالص طالما هى مش داعمة للفن المستقل كما تدعى وخلاص.
أزمة المخرج الشاب محمود يحيى
وكانت البداية عندما أعرب المخرج الشاب محمود يحيى، عن استيائه بسبب رفض سينما زاوية عرضه فيلمه الأول اختيار مريم، حيث كتب عبر فيس بوك: لكل من يهمه أمر السينما والثقافة والفن، لكل أساتذتي وزملائي، لكل من شارك أو شاهد أو برمج أو احتفى بفيلمي الأول اختيار مريم.. أنا أخوض الآن حرب غير متكافئة القوى مع القائمين على العرض والتوزيع السينمائي في مصر، تحديدًا القائمين على سينما زاوية، ضد محاولات دفن فيلمي ومنع عرضه السينمائي بدون أي سبب رقابي وبدون إبداء أسباب.. استثماري المالي ومجهود أربع سنين ومستقبلي السينمائي والفني كله على المحك ولذلك فأنا في حاجة لدعمكم المعنوي.
