علي ماهر: مبروك لـ الأهلي.. وعلى الرغم من حجم لاعبيه ما قدرش يجيب غير جول واحد
علق علي ماهر المدير الفني لفريق سيراميكا كليوباترا، على خسارة فريقه من النادي الأهلي، في اللقاء الذي أقيم بين الفريقين ضمن منافسات مسابقة الدوري الممتاز 2025-26.
وخسر سيراميكا كليوباترا من نظيره الأهلي في إطار الجولة السابعة لمسابقة الدوري الممتاز، بنتيجة 1-0، إذ أقيم اللقاء على أرضية ستاد القاهرة الدولي.
تصريحات علي ماهر
قال علي ماهر في تصريحات صحفية قبل قليل: مبروك لـ الأهلي، كنا بنلاعب فريق كبير، دايما لما نلعب قدام الأحمر بنبقى عندنا مشكلة أو ضغوط، وكنا نستطيع تسجيل هدف.
وواصل: مش هتكلم على ضربة جزاء، في النهاية يتلاعب فريق كبير.
وأضاف: لاعبو سيراميكا بذلوا مجهودا كبيرا، والفريق ما كنش كويس في الشوط الأول، والشوط الثاني بدأنا نرجع وعملنا أكتر من كورة كنا نقدر تستغلها.
وأكد: ما ينفعش تهاجم الأهلي، والفرق التانية دايما بتدافع قدامهم، لكن إحنا هاجمنا، وبقول هارد لاك لينا.
وكشف: بنلعب تحت ضغط استقبلنا هدف، وبعدها قدرنا نرجع للمباراة، وظهرنا بشكل كويس، والناس فاكر كل حاجة سهلة، بس الأهلي باللاعبين دي كلها ما قدرش يجيب غير جول واحد.
وأكمل: دايما بحاول أوجد حلول، ونشتغل على عقلية اللاعبين، بس في النهاية شخصية اللاعبين مهمة جدا، واللاعبين الجيدة عندي مشيت، زي بوبو وقندوسي، بنحاول نقدر نتعامل مع اللاعبين الحاليين، ولدينا وقت من أجل التحسين لدينا عمرو السولية تأقلم.
واستطرد: عمري ما حسيت أن الماتش راح من ايدي، طول الوقت بتبقي شغال في الملعب، وإهدار الفرص بتكون أصعب حاجة تمر على المدرب.
وأردف: كرة كريم نيدفيد كانت ممكن تكون جول لكن ما كنش في توفيق.
وأتم: تريزيجيه لاعب كبير وأتمنى أن الجماهير ما يكونش قاسية عليه، وكان أفضل لاعب في ماتش إنبي، ولا نطبطب على اللاعبين.
