محمد سراج عضو مجلس إدارة الأهلي يعتذر عن تهنئة بيراميدز بعد التتويج بكأس القارات الثلاث

اعتذر محمد سراج عضو مجلس ادارة النادي الأهلي عن قيامه بتهنئة نادي بيراميدز بعد فوزه بكأس القارات الثلاث علي حساب أهلي جدة السعودي. 

وكتب محمد سراج عبر صفحته علي فيسبوك:" بعتذر عن بوست التهنئة، من شوية، بس المقصد منه كان بمنتهى حسن النية وربنا الأعلم والمباركة كنت أقصد بها اللاعبين اللي لعبوا بروح عالية ورجولة كلاعبين مصريين (معظم الفريق ) قدام فريق غير مصري ولاعبين أجانب لكن ولا اقصد به تهنئة إدارات ولا غيره ولا في دماغي ولا نيتي ومحصلش إن حد هنأ النادي الأهلي قبل كده عشان أقدمله تهنئة رسمية،

 الموضوع حصل بشكل عفوى  وودي أنا كان ممكن أقول ده الأدمن أو غيره اللي كتب لكن أنا بحب المصارحة والمواجهة واحترام الجمهور والأصدقاء قبل كل شئ وأسأت التقدير في التهنئة، كلنا بشر في النهاية قد نخطىء أو نصيب". 

وواصل "أعتقد أنا معروف موقفي، وكان واضح في مواقف سابقة كتير ومتسجل قدام أي توجه ضد النادي من قريب او بعيد، وبالعكس البوست ملوش أي علاقة باستمراري في النادي من عدمه لأن مع كل مواقفي السابقة واللي ممكن تكون سببت ضررًا لي بشكل شخصي في أمور معينة، عمري ما طلعت وضحت أو تم المتاجرة بهذا الأمر، وسببها بيكون غيرتي على النادي زي أي مشجع ومحب للأهلي قبل ما أكون مسؤول، بالعكس أنا بكون كده مقيد بسبب تقاليد المنصب".

واختتم سراج كلامه:" بالعكس لو مش مستمر هكون واخد راحتي أكتر في الردود والهجوم عن كده وده هيحصل فعلا لو مش في موقع المسؤولية مستقبلًا، ولا هيفرق عندي أجامل حد ولا أكسب حد عشان مش موجود أو مش مكمل، الأهلي بيكون هو اللي في دماغي وبس.

…بعتذر مرة تانية والموضوع حصل بشكل عفوي وكل الاحترام لأي حد زعل أو أضايق من البوست وأهم حاجة، ربنا يكرمنا في المبارة القادمة، ويستعيد الفريق مكانه المفضل رقم 1 قريبًا إن شاء الله".

ونجح بيراميدز في التتويج بكأس القارات الثلاث بعد الفوز على أهلي جدة بثلاثة أهداف مقابل هدف.