آخر أمل ليا.. والد الصغير يونس المصاب بضمور العضلات يستغيث لجمع تبرعات الجرعة الثانية: حساباته هتتقفل في شهر ديسمبر
استغاث والد الصغير يونس مريض ضمور العضلات، لجمع تبرعات الجرعة الثانية من علاج نجله مع اقتراب إغلاق حسابات الصغير التابعة لوزارة التضامن الاجتماعي في شهر ديسمبر المقبل، وحتى الآن لم تجمع الأسرة إلا تكاليف الجرعة الأولى فقط.
والد الصغير يونس المصاب بضمور العضلات يستغيث لجمع تبرعات الجرعة الثانية
وقال والد الصغير يونس في تصريحات خاصة لـ القاهرة 24: أنا بناشد كل حد بيسمعني أنه يتبرع لابني الصغير يونس هو أملي الوحيد بعد ما أخواته خلاص بقوا قعيدين ومفيش أمل في علاجهم تمامًا، يونس الحمد لله جمع تكاليف علاج الجرعة الأولى وباقي له لسه جرعتين ولكن المشكلة أن حسابه هيتقفل بعد شهرين يعني شهر 12 الجاي ومش هيكون متاح له فتح حساب تاني إطلاقا.
وأضاف والد الصغير يونس: كل خوفي يكون مصير يونس زي مصير أخواته ويبقى قعيد وهو دلوقتي سندهم الوحيد وأملهم في الحياة، أنا أب لـ 3 أولاد مرضى ضمور عضلات عايز الناس كلها تسمع صوتي واستغاثي عشان خاطر ابني ونفسي صوته يوصل ويتعالج وتكاليف الجرعتين تتجمع في الشهرين دول ده أملي الوحيد وسندي.
وفي وقت سابق، استغاث والد صغير مصاب بضمور العضلات لعلاجه الذي تبلغ تكاليفه 13 مليون جنيه للجرعة الأولى ويحتاجه الطفل سنويًا، وهو بحاجة للعلاج بالحقن قبل بدء العام المقبل لمنع المضاعفات.
