قالي هبطلك الشغلانة لو صورتي.. الإعلامية نهاد سمير تنشر فيديو لتعدي مدير مستشفى عليها بسبب تصوير الإهمال الطبي
نشرت الإعلامية نهاد سمير استوري مقطع فيديو عبر فيسبوك يظهر خلاله لحظة تعدي مدير مركز الأفق الطبي عليها بسبب تصوير واقعة الإهمال الطبي.
وقالت الإعلامية نهاد سمير في بوست نشرته عبر فيسبوك: أنا بنزل الفيديو ده عشان ألحق أي حد ممكن يكون بيتعامل مع المركز الطبي الأفق اللي في المقطم شارع ٩، روحنا عياده عند دكتور أسمه أحمد. ش، عشان بنت أختي عندها ألم رهيب بعد عمليه عملتها في ضهرها.
وأضافت، بعدها قرر الدكتور يدخلها عمليات في نفس اليوم ويعملها حقن في مكان العملية عشان متحسش بألم ومش عارفين الدكتور عمل إيه وحقنها بإيه البنت طلعت قاطعة النفس من غرفة العمليات والدكتور مش عارف يقولنا إيه ومش عارف يتصرف حطوها على جهاز تنفس.
وتابعت: بعدها دخل أنابيب أكسجين والبنت جلها تشنجات وعشان مش عارف إيه المضاعفات اللي حصلت قرر ينيمها وهي اصلًا مش بتتنفس قعدت من الساعة ٩ بليل للساعة ٤ الفجر في العمليات وهو مرعوب ومش عارف يتصرف واللي بيساعدوه دكتور تجميل ودكتور عظام تقريبًا ولحد الساعة 4 قررنا نقول للدكتور يفوقها بلاش يديها حاجات تنيمها هو عايز يدخلها الرعاية.
وأشارت: قعدنا ندعي وده اللي في إيده قلنا له يا دكتور فوقها وبلاش مهدئات وافق ودخل ساعة يفوقها والحمد لله فاقت بس مكنتش كويسه أبدًا وبتاخد نفسها بالعافية وقعدنا لحد تاني يوم وخرجت تاني يوم قعدت أقل من 24 ساعة ونفسها اتقطع تاني وجالها تشنجات ومش عارفين نوديها فين جرينا بيها عند الدكتور اللي عارف المفروض هو أداها ايه وإزاي يلحقها.
كانت الكارثة آخر بهدلة وعدم ضمير الممرضة شتمت وضربت والدكتور أهم حاجة عنده ناخد البنت ونمشي من المركز بأي شكل ومش عايز يدينا تقرير ولا يدخل الحالة يلحقها هو مش عايز أي مسؤولية والبنت فضلت في الحالة دي وكلنا منهارين لحد ما وصل مدير المستشفي وسأل فين الإعلامية اللي هنا وعرف إني صورت فيديوهات للحالة وهما مش عايزين يساعدوها.
وبعدها قالي لو جبتي سيرة المركز في أي مكان هبطلك المهنة وأول ما شافني بصور اتهجم عليا زي ما باين في الفيديو وخد الموبايل ودخل مكتبه وقفل على نفسه عشان يمسح الفيديوهات، وكل الناس اللي شغالين بهدلونا وأنا كنت عايزة أوصل للمكتب أخد موبايلي.
ولما مسح الفيديوهات طلع الموبايل وكمل تهديدات وأنا خدت الحالة وطلعت بيها علي مستشفى حكومي والحمد لله لحقوها وكتبوا تقرير ومكنوش مصدقين اللي الحالة واصلة له كدمات في الصدر وجروح وكانيولات كلها بره الوريد في الرجل وفي الإيدين الاتنين كل إيد اتنين كانيولا وكلهم بره الوريد.
بس الحمد لله هي أحسن بس في مضاعفات لحد دلوقتي مش عارفين إيه السبب وليه بيحصلها كده وكل شوية نجري بيها على المستشفيات عشان نفسها اللي بيروح أنا نزلت الفيديو عشان تخلو بالكو وعشان دوري إني مسكتش علي أي إهمال وعشان محدش يروح المكان ده ويأذي نفسه.
