شقيقة أحمد زكي: منعرفش مقتنيات الراحل اتباعت ولا اتسربت.. ووائل الإبراشي تضرر من اللي حصل| خاص
كشفت شقيقة الفنان الراحل أحمد زكي، تضرر الأسرة بسبب أحوال مقتنيات الراحل، حيث إنهم لا يعلمون أين توجد مقتنياته حتى الآن.
وقالت شقيقة أحمد زكي خلال تصريحاتها لـ القاهرة 24: منعرفش مقتنيات أحمد زكي فين حتى الآن، آخر حاجة طلبناها من أشرف زكي قال لنا إنها هتتحط في معرض أو مكان يليق به، اتفاجئنا إن ده محصلش ومتحطتش في حتة، وتعبنا لأننا مش عارفين لغاية دلوقتي المقتنيات اتسربت ولا اتباعت ولا فين.
شقيقة أحمد زكي: منعرفش مقتنيات أحمد زكي فين
وتابعت: رافعين قضية عشان نشوف المقتنيات فين، لغاية ما تظهر ونحطها في مكان يليق بمشواره، وفي إعلاميين كتير اتكلموا معانا وقالوا لنا قد إيه هما زعلانين ولكن مش بيعملوا حاجة، مش بنوصل لنتيجة.
وأضافت شقيقة أحمد زكي: وائل الإبراشي كان متضرر جدا من اللي حصل في شقة أحمد زكي، ورحنا معاه ماسبيرو شوفنا فيديو للشقة لقينا حاجته مرمية على الأرض فحزنّا جدا ومستحملناش لأن مش أحمد زكي اللي حاجته يتعمل فيها كدة، والشقة ماكناش دخلناها من وقت وفاة هيثم.
وفي وقت سابق، أكد الدكتور أحمد فؤاد هنو وزير الثقافة، أن الوزارة تولي اهتمامًا بالغًا بالحفاظ على التراث الفني المصري، مشددًا على أهمية تكريم رموز الفن الذين أسهموا في تشكيل وجدان الأمة والاحتفاء بذكراهم.
