أبو ريدة: كنت بحضر حازم إمام ليكون خليفتي بالخارج.. ومش عارفين سكتنا بكأس الأمم
كشف هاني أبو ريدة رئيس الاتحاد المصري لكرة القدم، عن كواليس أفكاره المستقبلية في ملف رئاسة اتحاد الكرة بعد رحيله وانتهاء دورته الأخيرة، وموقف حسام حسن من الاستمرار في قيادة المنتخب الوطني بعد كأس الأمم الإفريقية.
تصريحات هاني أبو ريدة
وقال هاني أبو ريدة في تصريحات إعلامية مع سيف زاهر: أقدر أقول خليفتي بره مصر كان نفسي حازم إمام وأحمد مجاهد، كنت بجهز حازم والإعلام خلاه زهق من الهجوم دايمًا عليه، ومكنش عنده الصبر والجلد في كده، ومجاهد علاقاته بره كويسه جدا أكتر من هنا عكس ما الناس متوقعه، وهو بيشتغل كويس، ولكن بتبقي ليها رؤيه مين يمثل مصر خارجيًا.
وأضاف أبو ريدة: انا بالنسبة لي مفكرتش في رئاسة الاتحاد الأفريقي بشكل جدي، كان السيد عيسي حياتو موجود وظهر الحاج أحمد الضيف وكان فيه مشاكل كتير دفعت بيه في الصفوف الأماميه.
وتابع أبو ريدة: طبعًا سعيد على مدار أربع دورات وأنا مشرف على المنتخبات الوطنيه ومنتخبات الناشئين، الموضوع مكنش صدف والناس بتنسي، بس شرف كبير ليا أن ده يحصل في توقيت وجودي،
وأكد أبو ريدة: أي مدير فني اتعاملت معاه انا ببقي في ضهره، انا دايمًا بطمن حسام وإبراهيم حسن، ودايمًا بقولهم هدفنا كأس العالم ثم بطولة إفريقيا ثم الإعداد فيما بعد البطولة الإفريقية، وأكيد هما مكملين بعد كأس الأمم الإفريقية.
وعن تكوين منتخب مصر الثاني، تحدث قائلًا: الناس بتقولك فيه نظرية مؤامرة وراء تكوين منتخب مصر الثاني، أنا قولت لا أقبل ان مصر متشتركش في بطولة كأس العرب، وبالتالي كان لازم نفكر في حلول بديله للناس اللي مخدهاش كابتن حسام، واتكلمنا مع اللجنه الفنية، وقالوا نجيب جهاز لمدة شهرين تلاته، قولتلهم انتوا مدربين كبار وبتابعوا الدوري كده كده، فا الكابتن علي أبو جريشة وحسن شحاته قالوا حلمي طولان يمسك المنتخب ده ومعاه أحمد حسن، وجت كده مكنتش مترتبه.
وعن محمد صلاح، قال: محمد صلاح كابتن منتخب مصر، وهو دلوقتي في مرحلة النضج الكامل بره الكورة، ولما بيكون فيه موضوع معاه بيجي يتكلم معايا بياخد رأيي وباخد رأيه، ولكن الرأي الأول والأخير للجهاز الفني، ومش بيدخل نفسه في أمور خاصة بالجهاز.
وتطرق في حديثه إلى مشوار منتخب مصر في كأس الأمم الإفريقية قائلًا: رايحين كأس الأمم، مش عارفين السكه هتمشي إزاي، بس على الأقل هنكون في قبل النهائي، وارد يبقي عند إصابات ويبقي أي معوقات، دي رؤية كل الناس، الكورة ملهاش كبير.
وعن ملف التحكيم المصري، قال: حاليا راضي عن التحكيم، أوسكار رويز عامل شغل جيد، فيه وجوه جديدة ظهرت مش بيهمه أسماء، هو جي بيتكلم على المستقبل، كل فريق بيخسر حجته التحكيم، والخطأ وارد في العالم كله لكن فيه تحسن.
وأختتم تصريحاته قائلا: زعلان جدا على الأنديه الشعبيه، الدوري كان فيه كفر الزيات، حتي لو فيه أندية شركات زي غزل المحلة كان نادي جماهيري برضه، بيراميدز عملت طفره للكرة المصرية، الأصل في الكرة هو الشعب.
