منة شلبي عن تكريمها بمهرجان الجونة السينمائي: جائزة الإنجاز الإبداعي كبيرة على سني.. وأنا هاوية بأجر محترف
أعربت الفنانة منة شلبي، عن سعادتها الكبيرة بتكريمها في مهرجان الجونة السينمائي بجائزة الإنجاز الإبداعي، موضحة أنه ما زال هناك ما تقدمه للسينما المصرية والفن، بجانب حديثها عن أجور الفنانين.
وقالت منى شلبي، في ندوة تكريمها بمهرجان الجونة السينمائي: حاسة بخوف وتقدير، فكرة إنجاز العمر دي كبيرة أوي على سني وعلى اللي أنا عايزة أعمله، أنا مش حاسة أني انجزت إنجاز العمر، أكون عملت إنجاز العمر لما آخد الأوسكار، ولكن دي دفعة كبيرة أني متقدرة وخطواتي مؤثرة في أجيال كتير وده إنجاز العمر بالنسبة ليا، والممثل الحقيقي بيشقى جدًا في الشغل.
وعن أجور الفنانين، فعلقت منة شلبي: أنا هاوية بـ أجر محترف، ولغاية ما أموت عندي روح الهواية وبحترم التمثيل جدًا، روح الهاوي بتخليك مبدع ولكن لازم تاخد أجر محترف، مهم تعرف قيمتك ولكن متاخدهاش معاك وأنت بتمثل، وأنا بتفاوض وبتفق إنتاجيًا ببقى عارفة أنا فين ووصلت لـ ده إزاي، أنا بشوف نفسي أقل من أقل حد.
منة شلبي: مينفعش تشتغل والإيجو بتاعك عالي
ووجهت منة شلبي، نصيحة لـ الفنانين الشباب، قائلة: إدارة موهبتك صعب جدًا وأنت متعرفش تبقى ممثل والإيجو بتاعك عالي، الإيجو هيخليك محدود جدًا وهيكتفك تتفسح في نفوس البشر.
