أغمى عليا من كتر الضرب.. ننشر التحقيقات في قضية التعدي على سما طالبة الطالبية | خاص
حصل القاهرة 24 على نص التحقيقات في قضية التعدي على سما طالبة مدرسة عثمان أحمد عثمان، بمنطقة الطالبية بالجيزة، من قبل 5 متهمين بواسطة شومة، والتسبب في إصابتها بإصابات خطيرة.
نص تحقيقات قضية سما طالبة الطالبية
واستمع رجال التحقيق إلى أقوال سما ضحية الاعتداء بالطالبية، وجاءت كالآتي:
س: ما صلتك بالواقعة مثل التحقيقات؟
ج: أنا المجني عليها في المحضر والتي اتضربت واتعورت.
س: وما هي تفصيلات حدوث إصابتك؟
ج: اللي حصل إن أنا كنت خارجة مع صاحبتي من المدرسة لاقيت واردة بتسحبني معاها وبتقولي تعالي عاوزاكي في كلمتين ولاقيتها مرة واحدة بتمسك فيا وبتقولي أنت جيتي على أختي وأنا محدش ييجي عليها قولتلها في إيه مالك بيا، لاقيت مرة واحدة واحدة ست كبيرة جت عليا وبتزعق فيا قولتلها أنا هكلم ماما هي ترد عليكي، روحت مطلعة التليفون وبكلمها لاقيتها راحت سحبت مني التليفون وبتكلمها وشدوا مع بعض في التليفون ولاقيتها بتقول للبنات دي ست ذوق هي هتيجي تاخد حقنا بكرة، لاقيت البنات وكانوا ثلاثة بيضربوا فيا واللي مسكتني في الأول بتشدني وتنزلني من على الرصيف وبتقولي أنت تكلميني وأنت تحت فبحاول أبعد نفسي عنها لاقيتها مسكتني من شعري ولاقيت نورهان بتخربشتي في وشي وعضتني في إيدي ومامتها كانت عمال تضربني بالعصاية في رجلي لحد ما بدأت أدوخ منهم وأقع على الأرض والضابط جه أخذني ووداني المستشفى.
س: متى وأين حدث ذلك تحديدًا؟
ج: الكلام ده حصل يوم الأربعاء ٢٠٢٥/١/٢٤ الساعة ٠٤:٣٠ مساء قدام شارع مدرسة عثمان أحمد عثمان اللي في الطالبية.
س: وما سبب ومناسبة تواجد بالزمان والمكان سالفي الذكر إذا؟
ج: أنا كنت مروحة من المدرسة.
س: ومن كان برفقتك آنذاك؟
ج: كان معايا أصحابي البنات وكانوا حوالي 4 تقريبًا.
س: ألم يحاول أحد منع ذلك التعدي آنذاك؟
ج: لا هم محدش حاول لأنهم أخدوني بعيد عنهم.
س: ومن القائمين على ذلك التحدي تحديدًا؟
ج: هي طنط ماما نورهان وأختها اللي هي سلمى ونورهان اللي معايا في المدرسة وبنت معاها أنا معرفهاش.
س: وما صلتك بسالفي الذكر إذا أفهمناها؟
ج: مليش أي صلة بيهم خالص.
س: وكيف تواجدن سالفي الذكر حال وجودك بمحل الواقعة؟
ج: علشان هم كانوا مستنيني قدام المدرسة ونورهان دي بتقول إنها معايا في المدرسة.
س: وهل شاهدت نورهان علاء عثمان محمد من قبل داخل مدرستك؟
ج: لا أنا عمري ما شوفتها.
وحددت المحكمة المختصة، جلسة 27 أكتوبر الحالي، لنظر أولى جلسات محاكمة المتهمين بالتعدي على الطالبة سما، وإصابتها بجروح وخدوش وكدمات بواسطة عصا خشبية، أمام مدرسة عثمان أحمد عثمان بمنطقة الطالبية بالجيزة.
