زوجة تطلب الطلاق: جوزي بيشتمني قدام العيال ويقولي ده هزار

تقدمت سيدة في أواخر العشرينات بدعوى طلاق للضرر أمام محكمة الأسرة، وقالت إنها اتجوزت من 5 سنين وعيشتها اتحولت لجحيم بسبب إهانة زوجها المستمرة ليها تحت مسمى “الهزار”.

قالت الزوجة: جوزي لسانه صعب.. كل ما نزعل أو حتى نهزر يقولي كلام يجرح، وأول ما أزعل يقولي انتي حساسة، ده هزار يا شيخة.

وأضافت: المشكلة إن العيال بقوا يسمعوا الكلام ده وبيقلدوه، بقى يهينني قدامهم ويضحك، وأنا أتكسف من ولادي.

وأوضحت إنها حاولت تصلحه وتكلمه بالراحة، لكنه شايف إن “الرجولة” في إنه يرفع صوته ويكسرها بالكلمة.

وفي النهاية، قالت للمحكمة: أنا مش طالبة حاجة.. بس عايزة أعيش كويس.