أسما شريف منير توجه رسالة للساخرين من نطقها لكلمة "قرآن"
وجهت أسما شريف منير رسالة للساخرين من نطقها لكلمة "قرآن"، وذلك بعد ارتدائها الحجاب في الفترة الأخيرة، ومشاركتها للجمهور ببعض النصائح من تجربتها الأخيرة.
أسما شريف منير توجه رسالة للساخرين من نطقها كلمة “قرآن”
فنشرت أسما شريف منير فيديو لها، عبر حسابها الشخصي بموقع تبادل الصور والفيديوهات انستجرام، قالت فيه: يعني بصوا خلينا نقولها ببساطة، نفس الناس اللي بتقول ما تحكمش علي" و"خليك متفتح"، هم نفسهم ساعات بيتريقوا على حد بس لأنه نطق "قرآن" صح أو حاول يكون ملتزم شوية.
طب ما هو من حق كل واحد يعيش حياته زي ما هو شايف، ومن حق اللي بيحاول يكون قريب من ربنا إنه ما يتحطش في موقف سخرية.
وتابعت أسما شريف منير: يعني لو بنقول "عيش وسيب غيرك يعيش"، نطبقها على كل حاجة ما ينفعش تبقى شايف إن تصحيح كلمة إنجليزية غلط حاجة مهمة وبعدين تضحك على حد لأنه قال كلمة دينية صح، في الآخر كلنا بنتعلم من بعض، والاحترام هو الأساس.
وأضافت أسما شريف منير: فخلينا نكون لطاف مع بعض، ونسيب كل حد ياخد رحلته مع ربنا من غير ما نحسسه إنه غريب في النهاية، الدين معاملة وكلمة طيبة مش تريقة ولا حكم على حد.
