أول تعليق لعامل نظافة بعد تصدره التريند برفع علم ألبانيا عن الأرض: ده واجبي تجاه وطني | خاص
تصدر عامل نظافة، تريند منصات التواصل الاجتماعي، خلال الساعات القليلة الماضية، إذ ظهر عبر مقطع فيديو متداول، وهو يرفع علم دولة ألبانيا من على الأرض، بأحد الطرق المؤدية إلى المتحف المصري الكبير، بعد أن سقط بسبب الهواء.
أول تعليق لعامل نظافة بعد تصدره التريند برفع علم ألبانيا عن الأرض
ونال شريف بدر إسماعيل عامل النظافة صاحب الـ 44 عامًا، الذي تصدر التريند بسبب رفع علم ألبانيا، إشادات واسعة عبر منصات التواصل الاجتماعي، وخاصة أنه تحدث عن التحضر والوعي بأهمية احترام ضيوف مصر، بالتزامن مع احتفالية افتتاح المتحف المصري الكبير.
وروى، في تصريحات خاصة لـ القاهرة 24: مكنتش أعرف إني بتصور من بعيد، ولا كنت متوقع التريند، أنا كنت شغال في مكان عملي، ولقيت العلم واقع على الأرض وعلقته مكانه، دي حاجة في حب بلدي ووطني، ورجعته مكانه زي باقي أعلام الدول.
وقال عامل النظافة الذي تصدر التريند بسبب رفع علم ألبانيا: كنت في منطقة العمل، لأن أنا شغال عامل نظافة، والعلم وقع من على عمود الكهرباء، وطاير في الشارع وسط العربيات، ورجعته مكانه، فكرت في شكلنا قدام ضيوف بلدنا اللي جايين يحضروا احتفالية افتتاح المتحف المصري الكبير، مكنش ينفع يشوفوا علم بلدهم مرمي في الأرض.
وأضاف عامل النظافة: المصريين مش محتاجين حد يوصيهم على بلدهم، دي بلدنا وملناش غيرها، وهي اللي دايمة لينا، ولا واللي أنا عملته دا واجب على كل مصري، ومكنتش اعرف دا علم دولة إيه، بس فكرت في رئيس الدولة دي، وقولت شكلنا وموقفنا هيبقى إيه لما يشوف علم بلده واقع في الأرض كدا.
واستكمل: أنا شغال عامل نظافة في القاهرة بقالي 4 سنوات، وبرجع بلدي بأسيوط في الإجازات، وأمنية حياتي اني أجهز بناتي وأفرح بهم، عندي 5 بنات، وهما أملي في الحياة، ومش محتاج غير ستر ربنا.
