آمال ماهر: زواجي كان اندفاعًا.. وواجهت مشاكل في حضانة نجلي
كشفت الفنانة آمال ماهر، تفاصيل زواجها من والد نجلها عمر، موضحة أن هذا الزواج كان اندفاعا بسبب صغر عمرها آنذاك، كمان أن عائلتها عارضته بشدة وعزفت والدتها عن حضور الزفاف، مشيرة إلى أنها انفصلت في سن صغيرة، وعملت على تربية نجلها رفقة عائلتها بمفردها.
وقالت آمال ماهر، في تصريحات تليفزيونية: مش من السهل تلاقي حد يحبك لـ ذاتك، ولو اتخذلت في الحب بيبقى تحصيل حاصل، وتزوجت وأنا عندي 18 سنة، وفرق العمر بينا كان 16 سنة، كان زواج اندفاع، وأهلي عارضوا جدًا ووالدتي محضرتش الفرح وأكيد كان عندها حق، واتطلقت وأنا طفلة شايلة طفل.
آمال ماهر: ابني كان المنقذ علشان متجرش لأي طريق مش مظبوط
وأردفت آمال ماهر: عمر ابني مسؤوليته عندي خلتني أدور على كيان آمال، أنا كنت عايشة اليوم بيومه ومن غير مسؤوليات، وكنت بقول يا رب أنت ليه ادتني المسؤولية دي؟ وعرفت بعد 21 سنة أن ده علشان أحافظ على نفسي وأبقى آمال اللي أنتوا عارفينها، وأحس إن فيه حاجة بحبها أكتر من نفسي أعيش لها ومتجرش لأي طريق مش مظبوط، أحب أبقى كيان ابني يفتخر بيه، ابني كان المنقذ والبوصلة، أنا ملحقتش أعيش طفولتي وماليش ذكريات في طفولتي من غيره.
تصريحات آمال ماهر
وعن تربيتها لنجلها عمر، فعلقت آمال ماهر: عمر ابني كان طفل مُدلل وعايش في بيت عائلة فكلمتني مبتمشيش، وكنت ضد فكرة الضرب وأقول لا يمكن أضرب ابني، وأنا كسرت القاعدة وكنت بضربه علشان كلامي يمشي وهو مكنش سهل، وكان مٌتعب دراسيًا جدًا وغيرنا مدارس كتير وشقيت معاه علشان يوصل لمرحلة أنه يدخل جامعة في لندن.
وأوضحت آمال ماهر، أنها تحمل مشاعر الاحترام لوالد نجلها، قائلة: كان في مشاكل على حضانة عمر ولكن وصلنا لـ اتفاق وتحملت أنا المسؤولية، بس أنا بكن كل الاحترام لـ والد عمر علشان عمر موجود وهو حاجة كبيرة أوي بالنسبة ليا.
