اعترافات سائق عملية سرقة محل مجوهرات العجوزة: أدهم كلّمني نتسحر في المهندسين وطلع رايح يسرق محل دهب
كشفت التحقيقات في قضية القبض على 10 متهمين لسطوهم على أحد محال المجوهرات وسرقة مشغولات ذهبية وعملات أجنبية من داخل المحل تحت تهديد السلاح بمنتصف الليل في العجوزة، وذلك في القضية التي حملت رقم 4249 لسنة 2025؛ تفاصيل ارتكاب المتهمين الواقعة.
التحقيقات في واقعة سرقة محل مجوهرات العجوزة
وحصل القاهرة 24 على التحقيقات في القضية، وبثول المتهم محمد. ع. ش 27 سنة حول ما هي تفصيلات إقراره؟ أجاب: اللي حصل إني أعرف محمد سلطان وأدهم من فتره طوليه، لأننا جيران في الدرب الأحمر ودايما بنخرج مع بعض وبنقعد مع بعض علي القهوة، ومن فتره لقيت ادهم بيتصل بيا بيقولي تعالي نروح تتسحر في المهندسين، قولتله ماشي وقابلته عندنا في البياني منطقة الدرب الأحمر.
وأكمل: ولما روحتله كان معاه محمد سلطان واحمد سيد وركبنا العربية بتاع ادهم واتحركنا على المهندسين، ولما وصلنا المهندسين عند ماكدونالز لقيتهم بيتكلموا اننا جايين نسرق محل ذهب بتاع واحد خليجي وطلبوا مني اني مقعد على التارة بتاع العربية لحد ما يدخلوا يسرقوا المحل ويرجعوا، وقعدوا في العربيه حد ما لقوا الراجل بيقفل باب المحل بتاع الذهب وراح داخل من باب العمارة اللي فيها المحل وهما أول ما شوفوه دخل العمارة لقيت ادهم حط طبنجه في جنبه وأحمد سيد حط طبنجه في جنبه ومحمد سلطان كان معاد سكينه راح حاططها في جنبه وراحوا نزلوا ودخلوا وراه العمارة.
وأردف: وبعد خمس دقائق لقيتهم جايين خارجين بشنطة من جوا كان فيها الذهب والفلوس واتحركنا على الدرب الأحمر ونزل احمد سيد عند بيته وخد 50 الف نصيبه من الفلوس، وقالوا لما الذهب يتباع هيتوزع على الكل وسلطان اداني 50 ألف جنيه نصيبي من الفلوس بس بعدها خد الشنطة وطلع يجري لقيت ادهم خد مني الـ 50 الف ثاني بيقوني عشان هو خد الفلوس وجري وشكله كان حوار ومطبخينه سوا.
وواصل: وبعدين نزلت عند بيتي وفي نفس اليوم لقيت ادهم بيكلمني قبل الفطار وقالي ان الحكومة نزلتله وبتجري وراه وبعدها علي طول كان وقت الفطار لقيت مباحث العجوزة جيالي في شارع عبد العزيز وبيوروني فيديو ظاهر فيه محمد سلطان وادهم واحمد السيد وهما داخلين ورا الراجل عشان يسرقوه وبيقولولي تعرف الناس دي قولتلهم ايوه وحكتلهم على اللي حصل راحوا خدوني وبعدها هما اتمسكوا وجم علي قسم العجوزة وهو دا كل اللي حصل.
