أتمنى ربنا يسترد أمانته هناك.. أول تعليق من موسى الجبالي الفائز بقرعة الحج بالإسماعيلية مع زوجته وشقيقته | خاص
بدموع الفرح.. عبر الحاج المصري موسى الجبالي، ابن محافظة الإسماعيلية صاحب الـ 63 عامًا، عن فرحته بفوزه في قرعة الحج لهذا العام، حيث ظهر في مقطع فيديو تصدر التريند، وهو يسجد شكرًا لله خلال إعلان نتيجة قرعة الحج، وذلك ليس لفوزه هو وزوجته فقط، بل لفوز شقيقتيه معه في نفس العام، لتكون صحبة الخير معًا لبيت الله الحرام لأداء مناسك فريضة الحج.
أول تعليق من موسى الجبالي الفائز بقرعة الحج بالإسماعيلية مع زوجته وشقيقته
وقال موسى أدم الجبالي، الفائز بقرعة الحج في الإسماعيلية، في تصريحات خاصة لـ القاهرة 24: قدمت السنة اللي فاتت عشان أطلع الحج ودفعت 340 ألف جنيه لشركة سياحة وقدمت ورقي وجهزت جواز السفر، والشركة كانت لأخر لحظة معرفاني إني طالع الحج، ولكن رجعوا قالولي مفيش نصيب ورجعوا لي الفلوس بعد شهرين من نهاية موسم الحج.
وأضاف الحاج موسى الجبالي: السنادي نويت أقدم في قرعة الحج ليا أنا وزوجتي، وأختي كان نفسها تطلع معانا وأنا بعزها جدًا لأنها أصغر إخواتي، ووقت التقديم طلع مينفعش 3 أشخاص يقدموا مع بعض، وقدمت ليا أنا وزوجتي مع بعض ولها لوحدها، وكنا على يقين وقت التقديم ولحد ظهور نتيجة القرعة أن حد فينا هيروح والتاني لا.
وأكمل موسى الجبالي، بطل فيديو السجود خلال فوزه بقرعة الحج: الحمد لله اسمنا أتنادى ورا بعض، وسجدت شكر لله.. الحج فريضة وكان نفسي أزور بيت ربنا وأصلي في بيت الله الحرام، أنا مكنتش أعرف إني بتصور ولا كنت متوقع التريند، وبقول لكل الناس اللي تفاعلت مع الفيديو عقبالكم يارب وعقبال كل اللي عنده نية الحج.
وواصل موسى: أختي كانت طول الوقت نفسها تحج، حتى طلبت من ولادها قبل كدا يطلعوها للحج، وكنت ناوي لو أنا طلعت السنادي من غيرها، اطلع تاني معاها السنة اللي جاية حج سياحة، ويارب أروح ومرجعش، وربنا يسترد أمانته وأنا في الحج.
