مسن السويس في التحقيقات: بقول لجاري أنا راجل قد أبوك فضربني بالقلم على وشي مرتين| انفراد
كشفت التحقيقات في واقعة التعدي على مسن السويس، غريب مبارك، بمنطقة جبلاية السيد هاشم الجناين بمحافظة السويس، تفاصيل ما جرى في الواقعة، والأسباب التي أدت بالمتهمين لصفعه والتعدي عليه.
تحقيقات قضية مسن السويس
وينفرد القاهرة 24 بنشر التحقيقات في قضية صفع مسن السويس، واستمعت جهات التحقيق لأقوال المجني عليه وجاءت كالآتي:
س: ما تفصيلات حدوث اصابتك تحديدًا؟
ج: اللي حصل إن أنا ساكن في الدور الثاني في عمارة رقم 20 شارع خليفه إسماعيل - منطقة السيد هاشم - حي الجناين بقالي 26 سنة، وقاعد فيها مع عائلتي اللي مكونه من 7 أفراد والشقة دي إيجار قديم وأنا مأجرها من صاحب البيت اللي اسمه غريب.م، ومكنش في معايا أي مشكلة خالص طوال الفترة دي، لحد من يوم الاثنين اللي فات لقيت عاصم.غ، جاي وبيقولي إن ابني سرق الشقة بتاعتهم اللي هما عاملينها مخزن، والشقة دي مكانها في الدور الثالث في نفس العمارة اللي أنا قاعد فيها وهو وقتها كان معاه فيديو على التليفون متصور من كاميرا الشقة نفسها وباين فيها واحد ملتم ومستخبى في الهدوم اللى لابسها وكان شايل شنطة في إيده وبيقولي إن ده ابني محمد وهو اللي سرق المخزن بتاعنا.
وأضاف مسن السويس في التحقيقات: أنا قولتله لا يبني ده مش محمد ابني، واحنا معملناش کده وليه نعمل كده معاك، وكمان قولتله إن الوقت ده محمد كان نايم في البيت، وساعتها أخد بعضه ومشي وبعدها بحوالي ساعة كده لقيت علي جايب ناس تحت البيت، وأنا نزلتله عشان أشوف إيه الموضوع بالضبط، ونزلت اتكلمت مع علي وقولتله في إيه، قالي إن محمد هو اللي سرق المخزن بتاعهم وأنا قولتله طب أنا هجبلك محمد وشوف معاه الموضوع ده، وفعلا كلمت محمد ابني وقولتله تعالى يا ابني عشان نحل الموضوع ده، وساعتها أول ما وصل اتضرب من على وبعدها بلغنا النجدة واتعمل محضر، واتعرضوا على النيابة واتصالحوا في النيابة وروحوا، وساعتها عاصم وعلي قالولي انتوا لازم تسيبوا الشقة دي وتطلعوا منها بالمعروف بدل المشاكل، وساعتها أخدت عيالي وطلعنا وروحنا نقعد عند حماتي.
وتابع مسن السويس: يوم الواقعة أنا كنت رايح على البيت مع بنتي رحمة عشان أجيب العلاج، ولما وصلت عند العمارة لقيت الباب مقفول بجنزير وعم سعيد كان واقف تحت البيت، وده يبقي عم عاصم وکلمه عشان ينزل يفتحله الباب ونزله عشان يفتحله الباب، وأنا لما جيت أخش من الباب عاصم قالي لا مفيش دخول، وأنا قولتله إني عايز أجيب العلاج وأمشي بس، قالي لا مفيش دخول وبعدين راح كلم علي أخوه في ثانية، ولقيته قدامي وصل عند العمارة فضل يزعق ويشتم فيا، وأنا بقوله عيب عليك أنا راجل كبير قد أبوك راح ضربني بالقلم مرتين علي وشيـ والكلام ده كان فيه ناس كتير واقفين بس هما من طرفه، وبعدين أنا لقيت الناس اتلملت واللي اسمه علي ده اختفى من قدامي، والناس كلها جات حواليا لحد ما بعدها على طول لقيت النجدة وصلت، وخدوني وطلعوا بيا علي القسم عشان أعمل محضر، وقالولي إني لازم اجي النيابة عشان أتسأل.
