محمد عواد: الأهلي فريق كبير.. ولكن الزمالك محتاج بطولة السوبر المصري
عبّر محمد عواد حارس مرمى نادي الزمالك عن سعادته بالتأهل إلى نهائي كأس السوبر المصري 2025 على حساب بيراميدز عقب الفوز بركلات الترجيح 5-4، ومواجهة الأهلي في المباراة النهائية.
تصريحات محمد عواد
وقال محمد عواد في تصريحات لقناة أون سبورت: الحمد لله على المكسب النهاردة، وحارس مرمى الزمالك لازم يكون على أتم الاستعداد لأي فرصة تجيله، وأي حارس هتجيله الفرصة لازم يثبت إنه قد المسؤولية.
وأضاف: بشتغل في التمرين وزمايلي عارفين كدة، ولو مصديتش فـ بتخلي اللاعب اللي داخل عاملك ألف حساب، وكل ما تجيلك فرصة إنك تثبت دا فـ انت بتدي الأفضلية في المباريات المقبلة لنفسك.
وأشار محمد عواد في تصريحاته: لاعبي بيراميدز كبار وكل لاعب على أعلى مستوى، ومدرب الحراس جالنا امبارح وخلانا ندرسهم بالفيديو، وكل حارس له مدرسة خاصة وبحمد ربنا على توفيقه، لأن مهما كنت انت شاطر فـ لو مش معاك التوفيق الموضوع صعب.
وأفاد: الأهلي فريق كبير وبحب ألعب المباريات الكبيرة واحنا محتاجين البطولة دي عشان نبني عليها الموسم وإن شاء الله هنبدأ نحضّر نفسنا لمباراة القمة وإن شاء الله نشرّف الكرة المصرية وبلدنا، والبطولة دي هتكون غالية جدًا بالنسبالي.
واستمر محمد عواد في تصريحاته: أنا تحت أمر الزمالك في أي وقت، ولما بتيجي فرصة إني أثبت لأصحاب إني قد المسؤولية مش بتأخر وعمري ما اترددت في لحظة إن الزمالك يكون محتاجني وملبيش الطلب.
وأتم: عصام الحضري واحد من أساطير مصر في ضربات الجزاء وانتهزت فرصة تواجده عشان يمضيلي على القميص.
